DILI, 17 Juñu 2025 (TATOLI)-Prezidente Repúblika, José Ramos Horta, dadeer ne’e ho delegasaun dezloka ona ba Malázia hodi halo vizita privadu no servisu Estadu nian bá Mónaku.
Xefe Estadu ho delegasaun dezloka ho aviaun Aero Dili husi tuku 09.00 no sei to’o iha Bali tuku 10.00 oras Bali nian, hodi kontinua kedas bá Malázia.
Tuir ajenda, durante estadia iha Malázia, Xefe Estadu sei simu tan títulu doutor honoris causa husi Taylor’s University, aumesmu tempu partisipa lansamentu livru husi Primeiru-Ministru Malázia nian, Anwar Ibrahim. Atividade hirak-ne’e sei akontese husi loron 17 – 22 fulan-Juñu.
Husi Malázia, Premiadu Nobel ba Dame 1996 ne’e kontinua kedas viajen Estadu bá Mónaku hodi atende atividade ne’ebé sei akontese iha loron 23 to’o 25 Juñu 2025, tuir pedidu konsentimentu anteriór ne’ebé hatama ba Parlamentu Nasionál iha loron 02 Juñu.
Durante iha Mónaku, Xefe Estadu sei partisipa aniversariu ba dala 20 fundation for post-conflict development no aniversariu ba dala 10 kriasaun FPDC- Mónaku.
Notísia relevante: Rezultadu vizita Xefe Estadu ba Bulgária no Reinu Unidu, inklui Vatikanu
Jornalista : Hortencio Sanchez
Editora : Rita Almeida
