DILI, 17 Juñu 2025 (TATOLI)-Universidade haat iha Timor-Leste no Fundasaun Annur asina nota entendimentu (MoU, sigla ingles) ho Universidade Terbuka (UT) Indonézia atu kapasita estudante no dosente sira iha área oinoin.
Ensinu superior sira ne’ebé asina MoU mak Universidade Orientál Timor Lorosa’e (UNITAL), Institutu Siénsia Superiór Kristal, Universidade Dili (UNDIL), Dili Institute of Technology (DIT), no Fundasaun Annur ne’ebé tau matan ba ensinu báziku no sekundáriu Annur iha Kampung Alor.
“Nota entendimentu ne’e atu benefísia ba parte hotu; dahuluk mak ba Timor-Leste nia estudante no dosente sira. Daruak mak atu bele fasilita kooperasaun potensiál ne’ebé bele halo hodi kompleta malu entre Timor-Leste ho Indonézia”, Reitór UT Indonézia ba jornalista sira iha Sentru Kultura Indonézia, tersa ne’e.
Nia dehan objetivu seluk mak enkoraja sira atu vizita Timor-Leste no eskola sira, konversa ba malu no mós hasoru ofisiál governu nian.
“Buat hotu prontu ona, por-ezemplu rejistu estudante potensiál sira agora daudaun loke ona ba estudante Timor-Leste”, afirma nia.
Reitór UT ne’e akresenta saida mak parte rua halo atu presta entendimentu ne’ebé di’ak liu ba estudante no mós dosente sira.
“Kooperasaun ida-ne’e halo barak liuba lisensitaura no mós mestradu. Ba ensinu báziku no ensinu sekundáriu Annur mak hadi’a no hamoris sira-nia matéria ne’ebé avansadu ba estudante sira”, nia haktuir.
Kritéria aplika ba bolsa iha UT mak tenke iha kartaun identidade, pasaporte no ramata ona husi ensinu sekundáriu.
Reitór UNITAL, Claudino Ninas Nabais, hatete serimonia ne’e importante iha kooperasaun ba bolsa estudu, peskiza no semináriu.
Nia dehan liuhusi MoU ne’e UNITAL sei tau prioridade ba fakuldade medisina. “Enfermajen estudante barak loos maibé dosente menus, la’ós ema iha mak universidade la rekruta, la’e. Maibé dosente ba área ida-ne’e mak la iha. Dosente espesializadu menus, entaun ida-ne’e mak ami hanoin ko’alia ho sira”.
Notísia relevante: FDCH asina MoU ho universidade lima iha Indonézia
Jornalista : Osória Marques
Editora : Rita Almeida
