BOBONARU, 18 Juñu 2025 (TATOLI)–Autoridade Munisípiu Bobonaru sei kontinua propoin iha proposta orsamentu tinan 2026, atu aumenta fasilidade no kria kondisaun balun iha merkadu Mau-Mali, ne’ebé lokaliza iha suku Ritabou, postu administrativu Maliana, munisípiu Bobonaru.
Diretór Servisu Munisipál Jestaun Merkadu munisípiu Bobonaru, Paulo dos Santos, hateten, Autoridade munisípiu liuhusi reuniaun Konsellu Koordenasaun Munisipál kada tinan tau orsamentu atu kontinua hadi’a merkadu Mau-Mali tanba orsamentu alokadu iha Planu Dezenvolvimentu Integradu Munisipál (PDIM) durante ne’e la sufisiente atu akomoda fasilidade sira ne’ebé presiza.
“Ita halo dala-ida de’it maibé ita haree filafali ba orsamentu tanba fazeadamente, uluk halo uma, 2024 ita halo morru tuir filafali tinan ne’e ita propoin tan orsamentu, maibé ha’u la hatene tanba PDIM mak koloka, ita kontinua tau osan para ita halo ruku, kuartu-kuartu para aban bain-rua bainhira ita lori negosiante sira bele uza fatin ne’e no sira selu,” Diretór informa ba Jornalista sira, foin lalais ne’e, iha Salaun Maria-Tapo.
Autoridade munisípiu Bobonaru liuhusi orsamentu PDIM tinan 2024 ho valór $184.718,13 harii ona morru protesaun ho luan metru 400 no naruk metru 4.000 kompleta ho uma ba Seguransa.
Notísia Relevante : Atividade bazár semanál iha merkadu Mau-Mali hahú reativa hafoin paradu 2024
Autoridade Munisipál kontinua tau-atensaun ba merkadu Mau-Mali tanba iha planu ba futuru katak merkadu ne’e mak sei sai hanesan sentru merkadu munisípál.
“Ita liga ba ita-nia merkadu sentrál aban bainrua, ita atu muda bá merkadu Mau-Mali ne’e, agora ho kondisaun ida hanesan ne’e bele ka la’e? ita hadi’a para aban bainrua merkadu iha, ne’ebé merkadu sentrál agora ne’e tau fali ba planu seluk dehan katak Sentru Komérsiu,” nia katak.
Notísia Relevante : Merkadu Mau-Mali seidauk funsiona atu negosiante sira hala’o atividade negósiu
Nune’e mós, Negosiante husi Merkadu Mau-Mali, Delfina Pereirra, konkorda ho desizaun husi autoridade Munisípiu Bobonaru tanba Estadu gasta ona orsamentu barak ba merkadu ne’e maibé durante ne’e la funsiona ho di’ak.
Aleinde ne’e, kada Tersa ne’ebé hanesan loron bazar iha merkadu Mau-Mali, maibé ladún hetan rendimentu di’ak tanba menus kompradór.
“Iha fulan hirak liubá foin bazar ne’e rame, maibé agora ema la mai, só sira manu-futu de’it. Ami hakarak sira iha merkadu leten ne’e muda hotu mai para ita bele fa’an hotu iha ne’e, se la’e nafatin hanesan, ami fa’an modo futun ida mós la kotu, depois la muda mai, Estadu halo uma ho morru ne’e saugati de’it,” nia tenik.
Tuir observasaun Jornalista Ajénsia TATOLI, I.P iha terrenu, nota katak daudaun ne’e Diresaun Servisu Munisipál Jestaun Merkadu munisípiu Bobonaru kontrata ona pesoál seguransa na’in-ida iha merkadu Mau-Mali hodi kontrola no asegura obra ne’e.
Jornalista : Sergio da Cruz
Editora : Julia Chatarina
