VIKEKE, 18 Juñu 2025 (TATOLI)-Diretór ba Sekretariadu Tékniku Administrasaun Eleitorál (STAE) munisípiu Vikeke, Humberto Fernandes, hatete sira nia parte seidauk realiza atendimentu movel hodi prodús kartaun eleitorál ho sistema biometriku ba komunidade tanba kestaun menus ekipamentu.
“Materiál sira-ne’e sai ami-nia preokupasaun, nune’e ami kontinua hato’o ba STAE nasionál, ne’ebé ita hein de’it bainhira mak haruka ekipamentu mai, liuliu laptop no printer”, dehan nia ba TATOLI iha ninia servisu fatin, ohin.
Ho kestaun menus ekipamentu, nia dehan atendimentu movel iha postu sira seidauk realiza tuir planu.
“Atendimentu ba postu ne’e ami halo koordenasaun ho CNE no rejistu notaridu atu labele preokupa ba dokumentu seluk hanesan sertidaun moris no billete identidade. Tanba ne’e, kuandu ita bá postu sei koordena ho notariadu atu bá dala-ida. Nune’e mós sei koordena ho Prezidente Autoridade hodi fó karta autorizasaun no parte polísia hodi garante servisu iha postu”, nia realsa.
Entretantu funsionáriu ne’ebé serbisu iha STAE munisípiu Vikeke hamutuk na’in ualu, ne’ebé fó-atendimentu kada loro ba eletór sira iha Vikeke.
Notísia relevante: Semana oin STAE atribui hikas kartaun biométriku hafoin suspende fulan-rua
Jornalista : Vitorino Lopes da Costa
Editora : Rita Almeida
