DILI, 20 Juñu 2025 (TATOLI)-Institutu Nasionál Estatístika Timor-Leste (INETL) rejista Índise Presu Konsumidór (IPK) ba fulan Maiu nian tun (deflasaun) 0, 2%, kompara ho Abríl 2025 sa’e (inflasaun) 0,1%.
Tuir dokumentu INETL, mudansa presu grupu hotu tun 0,2%, tanbá hetan kontribuisaun husi grupu hahán no bebida la’os alkoólika tun 0,5%, no transporte 0,3%.
“Grupu hatais no sapatu sa’e 0,4% sai hanesan mudansa kontráriu ba inflasaun grupu hotu. Grupu hahán no bebida la’ós alkoólika tun 0,5% tanba hetan impaktu maioria husi subgrupu foos 0,4%, modo tahan 1,9%, ai-fuan 0,8% no na’an 0,1%”, refere nota husi INETL.
Relasiona ho subgrupu mina no bokur sa’e 0,1%, kafé, xá no kokoa 1,8%, susubeen, keiju no nanu-tolun 0,5% no produtu ai-han 0,2%, ne’ebé sai hanesan mudansa kontráriu ba inflasaun grupu hahán no bebida la’ós alkoólika.
Mudansa persentajen IPK anuál tun 0,2% kompara entre fulan-Maiu 2025 no Maiu 2024, hetan kontribuisaun husi grupu hahán no bebida la’ós alkoólika -0,3%, alkoól no tabaku tun 0,9%, transporte 1,8%, no komunikasaun 0,9% ba anuál Maiu 2025.
Grupu hatais no sapatu sa’e 0,9%, ekipamentu no manutensaun mobilariu uma-laran 0,7%, edukasaun 0,4%, uma 0,5%, no rekreasaun no kultura 0,6%, sai hanesan mudansa kontráriu ba inflasaun grupu hotu ba anuál Maiu 2025.
Inflasaun tradeable (mudansa presu produtu hotu ne’ebé iha dependénsia maka’as ba kompetisaun merkadu internasionál) tun 0,4% no non-tradeable (mudansa presu produtu hotu ne’ebé iha dependénsia maka’as ba fatór merkadu doméstiku) laiha mudansa 0,0% iha mensál, kompara entre Maiu no Abríl 2025.
Inflasaun Tradeable tun 0,5% no non-tradeable sa’e 0,5% iha anuál, kompara entre Maiu 2025 no Maiu 2024.
Notísia relevante: INETL rejista inflasaun iha Abríl sa’e 0,1%
Jornalista: Arminda Fonseca
Editora: Maria Auxiliadora
