Saúde Bobonaru rejista kazu asu tata ema 137 no óbitu rua
BOBONARU, 20 Juñu 2025 (TATOLI)—Servisu saúde Bobonaru liuhusi Departamentu Vijilánsia Epidimolojía Diresaun Servisu Munisipál Saúde, hahú husi janeiru to’o 19 Juñu 2025 ne’e, rejista kazu asu ta ema sa’e ba 137 no husi númeru ne’e óbitu rua (2) mak joven mane ida naran Ricardo Torezão Lopes (idade 19) no labarik feto ida ho naran Emilia Vicente (idade 7).
Notísia Relevante: Labarik ne’ebé infetadu raiva hakotu ona iis iha HNGV
Kazu hirak ne’e relata husi Postu no sentru Saúde sira-ne’ebé eziste iha postu administrativu neen (6) iha munisípiu Bobonaru inklui relatóriu husi Hospitál Referál Maliana no pasiente sira-ne’e simu hotu ona vasina.
“Kazu asu tata iha munisípiu Bobonaru sa’e ona ba 137 ne’ebé kompostu husi mane 84 no feto 53,” Responsavél Vizilansia Epidiomolojía Servisu Saúde Munisipál Bobonaru, Zito Viegas Vicente, informa ba Agência Tatoli liuhusi WhatsApp, sesta ne’e.
Aleinde ne’e, Diretór Servisu Munisipál Saúde, Autoridade Munisípiu Bobonaru, Gíl Bernardo Vicente, husu ba komunidade atu kuidadu no hadook-aan husi asu ne’ebé agresivu no bainhira asu tata tenke halai lalais mai fasilidade saúde hodi simu vasina.
“Hakarak fó hatene ba komunidade Munisípiu Bobonaru, tanba agora ita iha fronteira, ita iha problema asu ne’ebé pozitivu raiva ne’e barak. Ha’u husu ba ita-boot sira atu kuidadu-aan no mós Asu sira ne’ebé iha favor sulan no tenke ser Vasina,se karik sira ne’ebé hetan Asu tata halo favor hakbesik-aan mai fasilidade saúde hodi hetan vasinasaun, tanba moras ne’e perigu ba ita-nia vida,” nia dehan.
Tuir dadus, hahu husi Janeiru to’o Marsu 2025 ne’e, Departamentu Veterinaria relata katak asu pozitivu virus Raiva hamutuk 20 no numeru ne’e relata husi postu administrativu neen (6) iha hunisípiu Bobonaru, maibé barak liu iha Maliana no Kailaku ne’ebé konsidera área risku.
Notísia Relevante: Asu ne’ebé tata ema na’in-hitu iha Atabae konfirmadu pozitivu raiva
Jornalista : Sergio da Cruz
Editór : Cancio Ximenes
