DILI, 21 Juñu 2025 (TATOLI) – Fundu Dezenvolvimentu Kapitál Umanu (FDCH-sigla iha portugés), parseria ho Lorosa’e English Language Institute (LELI), ohin realiza teste profisiénsia lian inglés padronizada ba kandidatu bolseiru na’in-70 ne’ebé konkorre ba vaga 54 hodi foti kursu lisensiatura no mestradu iha instituisaun ensinu superiór sira iha Malázia, iha área medisina, teknolojia no seguransa sibernétika.
Diretór-Ezekutivu FDCH, Júlio Aparício, informa katak totál kandidatu sira ne’ebé submete dokumentu hamutuk na’in-398, husi númeru ne’e na’in-249 mak liu iha selesaun dokumentu.
Tuir dirijente ne’e, kandidatu sira ne’ebé mak liu sei ba estuda iha Asia Pacific University of Technology & Innovation, University Malaysia Sabah, Multimedia University – MMU Cyberjaya, University Kuala Lumpur, Universiti Sains Malaysia no University of Tecnology Malasya.
“Ita realiza ona teste diagnóstiku ba kandidatu bolsa estudu na’in-249 no 70 mak passa. Ohin, sira tuir teste profisiénsia língua ingleza padronizada no área espesifíka seluk, tanba ezijénsia husi universidade sira iha Malázia katak tenki iha valór mínimu 5.0 ba kursu lisensiatura no 6.0 ba mestradu. Entre bolseiru na’in-54, na’in-5 sei foti kursu mestradu”, Júlio Aparício hatete ba Tatoli, iha Timor Plaza, Dili.
Iha oportunidade ne’e mós, Diretór-Ezekutivu husu ba profesór sira husi munisípiu hotu atu fó atensaun ba estudante sira, liu-liu iha língua estrangeira no lian ofisiál atu ajuda sira bele konkorre bolsa estudu iha rai liur, tanba kandidatu bolseiru sira agora mai husi eskola sira iha kapital de’it.
Iha fatin hanesan, kandidatu bolseiru Tomás Ferreira konsidera katak teste ne’e la fásil, tanba ne’e tenki prepara-an no estuda makaas.
Nia refere katak hakarak estuda iha área seguransa sibernétika, tanba sei kontribui ba iha dezenvolvimentu ba sistema digitál.
Notísia relasionada: FDCH prepara tán bolseiru 15 ba bolsa estudu méritu iha Portugál-Brazil
Jornalista: Jesuína Xavier
Editora: Isaura Lemos de Deus
