Autoridade lokál Pássabe propoin hadi’a merkadu tradisionál Malelat

OEKUSI, 23 Juñu (TATOLI) – Xefe Suku Malelat,  José Marques, rekomenda ba Governu liuhusi Diresaun Komérsiu no Indústria Rejiaun Administrativa Espesiál Oekusi Ambeno ho Ministériu Komérsiu no Indústria (MKI) atu hadi’a no muda merkadu tradisionál Malelat.

Autoridade komunitáriu ne’e hato’o nia rekomendasaun iha ámbitu vizita ofisiál Autoridade RAEOA ho Vise-Ministru MKI iha suku Malelat sub-rejiaun Pássabe, foin lalais ne’e.

Notísia relevante:MKI identifika ona fatin foun hodi muda merkadu tradisionál Pássabe

“Ha’u planu atu merkadu ida maibé ha’u-nia kbi’it la to’o, ne’ebé ohin Nai-ulun sira mai vizita ha’u-nia suku, ha’u hakarak rekomenda de’it, hadi’a ami nia merkadu, fatin ami prepara ona maibé, tanba merkadu ne’e hala’o kada semana iha loron kuarta, akumula ema barak, balu mai husi Nítibe, Oésilo sorin inklui husi Pante Makasar mós sa’e mai, entaun fatin klot, barak ma tuur de’it iha dalan ninin,” nia rekomenda iha sede suku Malelat.

Nia informa, merkadu referidu eziste kle’ur ona, maibé Govenru konstrui de’it uma ida, nune’e kada loron basar, komersiante sira hadau malu fatin hodi buka mahon, nune’e espera ho vizita ofisiál ne’e, Governi bele tau konsiderasaun, ba futuru bele hadi’a.

Jestór sub-rejiaun Pássabe, Paulino Marques, reforsa-tan katak merkadu tradisionál Malelat, lideránsa suku eskolla ona fatin foun, maibé hein de’it apoia husi Governu.

“Razaun hakarak muda no hadia merkadu ne’e, tanba fatin klot liu, aliénde ne’e iha tempu bazar loron kuarta, ema barak mai, maibé fatin la sufisiénte, balu mós faan iha estrada ibun, ne’ebé impede mós movimentu transporte, tan ne’e ami hakarak muda merkadu ba fatin luan, ne’ebé autoridade suku prepara ona, hein de’it apoia husi Governu,” nia rekomenda.

Hatan ba rekomendasaun ne’e, Vise-Ministru MKI, Agostu Juniór Trindade, promete sei koordena hamutuk ho Autoridadade RAEOA, nune’e bele konsidera ba futuru atu integra iha Planu Asaun Anuál (PAA) tinan oin.

“Rekomendasaun sira, ami konsidera, tan ne’e ami mai besik ita bo’ot sira atu rona saida mak presiza halo bai ha sukune’ebé importansia direita ba populasaun, entaun imi-nia sujestaun sira-ne’e, ha’u sei koordena ho Autoridade RAEOA, atu haree  hamutuk, Oekusi hanesan autonimu espesiál, iha fundu ketak, atu oinsa bele servisu hamutuk liuliu atu prevee orsamentu balun, hodi muda merkadu ne’ebé ohin ita haree ona, loos duni fatin klot,” nia hateten.

Notísia relevante:Grupu sia iha suku Malelat susesu implementa projetu HAPAS

MKI disemina enkudramentu legál ba lisensiamentu-prosedimentu industriál ba setór privadu Oekusi

Jornalista: Abílio Elo Nini

Editór: Florencio Miranda Ximenes