OEKUSI, 18 Juñu (TATOLI) – Ministériu Komérsiu no Indústria (MCI, sigla portugés), kuarta ne’e, hala’o diseminasaun ba Dekretu-Lei númeru 90/2023, loron 27 Dezembru 2023, kona-ba lisensiamentu industriál no Dekretu-Lei númeru 91/2023, kona-ba baze industriál, Dekretu-lei Governu númeru 4/2024 loron 11 Dezembru, kona-ba regulamentu prosedimentu lisensa vitória industriál ba setór privadu sira iha Rejiaun Administrativa Espesiál Oekusi Ambeno (RAEOA).
“Intensaun desimeniasaun ba lei sira-ne’e, ita rasik tenke hatene katak ita halo negósiu ida, tenke iha regra ida mak lisensiamentu komersiál no industriál ne’ebé importante tebes, entaun Ministériu Komérsiu no Indústria la’o hale’u territóriu, tanba iha dekretu-lei foun sira-ne’e, setór privadu sira presiza duni atu hatene liuliu ba lisensiamentu,” Vise-Ministru Komérsiu no Indústria, Agusto Junior Trindade, ko’alia iha Otél Lifau.
Notísia relevante:MCI lansa kompetisaun negósiu inovativu ba dalimak atu apoiu empreza lokál
Tuir Governante ne’e katak setór privadu sira nu’udar parseriu Governu nian no sai mós pilár importante ba dezenvolvimentu ekonómia hahú husi baze, entaun Governu nia papél mak kriasaun ba lei sira-ne’ebé bele asegura funsionamentu setór privadu nian operasaun ekonómia.
“Ha’u fó exemplu, lei kona-ba zero plástiku ba iha ambiénte, katak plástiku sira-ne’ebé tama mai Timór hanean materiál ne’e 30%, maibé plástiku ne’ebé tama mai ho sasán iha laran ona ne’e kona 2,5%, entaun presiza ármonia, atu lei sira-ne’e labele halo todan ba ita-nia industria rai laran,” nia hateten.
Iha fatin hanesan, Sekretáriu Rejionál ba Asuntu Administrasaun Adre La’o, konsidera diseminasaun ne’e importante ba setór privadu sira iha Oekusi, tanba Oekusi nu’udar rejiaun espesiál ne’ebé fronteira direita ho nasaun viziñu no fasíl halo importasaun no esportasaun.
Entretantu, diseminasaun ne’e hala’o durante loron ida, hetan partisipasaun másimu mai husi setór privadu sira liuliu emprezáriu lokál no internasionál sira, grupu feto potensiál sira, inklui estudante no autoridade komunitária.
Notísia relevante:MCI aprezenta ona Kréditu Saudavel bá KM hodi hetan aprovasaun
Jornalista: Abílio Elo Nini
Editór: Florencio Miranda Ximenes
