DILI, Juñu 2025 (TATOLI)-Governu liuhosi Ministériu Ensinu Superiór Siénsia no Kultura (MESSK), prepara miliaun $2 ba programa subvensaun públika ba Institutu Ensinu Superiór (IES) iha Timor-Leste.
“Tinan ne’e MESSK prepara miliaun $2 ba Institutu Ensinu superiór sira, maibé ba tinan ne’e subvensaun ne’e ita prevee buat tolu de’it, ida ba estudante sira, fó formasaun ba ita-nia dosente no ajuda mós dosente sira”, Ministru MESSK, José Honório da Costa Pereira Jerónimo, ba TATOLI iha nia knaar fatin Kolmera, segunda ne’e.
Governante ne’e husu Institutu Ensinu Superiór submete relatóriu, nune’e bele distribui subvensaun públika ne’e. “Tanba ne’e, universidade bele hatama relatóriu mai atu bele fó subvensaun públika”.
Reitór Universidade Orientál Timor Lorosa’e (UNITAL), Claudino Ninas Nabais, relata maske seidauk hatama proposta, maibe simu ona karta husi Ministériu Ensinu Superiór Siénsia no Kultura katak iha tinan ne’e kuaze hetan subvensaun públiku rihun $105.
“Ami seidauk hatama proposta kona-ba subvensaun públiku, maibé ami hetan ona karta husi Ministériu Ensinu Superiór Siénsia no Kultura, ne’ebé hatete katak ami hetan osan ba tinan ne’e kuaze rihun $105”, katak nia.
Notísia relevante: ISC utiliza subvensaun públika ba konstrusaun laboratóriu
Jornalista : Osória Marques
Editora : Rita Almeida
