DILI, 24 Juñu 2025 (TATOLI)-Komisaun C iha Parlamentu Nasionál, ne’ebé trata Asuntu Finansa Públika sujere ba Ministériu Administrasaun Estatál (MAE) atu promove liután ezekusaun orsamentál ne’ebé desentralizada iha munisípiu sira.
Deputada relatora, Aliança da Conceição Araújo, lee sai relatóriu no pareser komisaun nian kona-ba avaliasaun dezempeñu Governu iha trimestre dahuluk tinan 2025 katak ezekusaun 20% de’it ba munisípiu sira, tanba ne’e presiza apoiu tékniku no finanseiru hodi implementa efisientemente ninia orsamentu.
“Komisaun propoin programa formasaun iha kontabilidade públika, aprovizionamentu no kontrolu internu ho monitorizasaun regulár husi parte Ministériu Finansa”, deputada relatora ne’e dehan iha plenária Parlamentu Nasionál, ohin.
Komisaun sujere mós ba Ministériu Administrasaun Estatál (MAE) atu dezenvolve norma ida klara ba jestaun orsamentál munisipál, garante konsisténsia no efisiénsia no fornese apoiu tékniku no finanseiru ba munisípiu sira hodi fortalese ninia kapasidade jestaun orsamentál.
“Realiza estudu no peskiza hodi identifika dezafiu prinsipál no oportunidade relasiona ho ezekusaun orsamentu munisipál”, nia akresenta.
Durante trimestre dahuluk 2025, totál orsamentu finál atribui ba autoridade munisípiu sira hamutuk $123.623.927, ho nia ezekusaun ho montante $17.779.113 ka 14,4%.
“Ezekusaun orsamentál iha kategória lima, despeza ba munisípiu ho taxa ezekusaun aas mak hanesan administrasaun munisipál Ainaru 18,3%, destaka hanesan efesiente liu iha períodu tuir análize ne’ebé ezekuta $1.444.043 husi montante $7.879.211”, nia informa.
Ba administrasaun munisipál Manatutu ho taxa ezekusaun 18,2% (husi totál $7,5), Kovalima 16,9% (millaun $8,3), Dili 15,1% (millaun $19,2).
Notísia relevante: Ezekusaun OJE 2025 iha trimestre dahuluk atinje 24,2%
Munisípiu sira ho taxa ezekusaun orsamentál ki’ik liu entre munisípiu sira seluk mak Vikeke ho de’it 9,6% (husi totál verba millaun $10), Ataúru 11,1% (millaun $2,8) no Bobonaru 12,6% (millaun $11,3).
Tuir relatóriu, maioria administrasaun munisipál aprezenta taxa ezekusaun entre 13% no 14%, ne’ebé reflete ba ezekusaun moderada iha inísiu tinan ne’e. Situasaun ne’e akontese relasiona ho prosesu administrativu, atrazu iha kontratasaun públika ou limitasaun operasional típika iha primeiru trimestre.
Relatóriu ezekusaun orsamentál referidu ba trimestre dahuluk la aprezenta informasaun dezagregada ba klasifikasaun ekonómika, ne’ebé imposibilita realizasaun análize ida detalla iha komponente ne’e.
PN liuhusi reuniaun plenária ohin realiza mós diskusaun hodi halo apresiasaun ba relatóriu no pareser relativu ba relatóriu ezekusaun orsamentál iha trismestre dahuluk nian.
Notísia relevante: Orsamentu ba munisípiu aprovadu, PN husu dezenvolve kapasidade munisípiu
Jornalista: Nelson de Sousa
Editora: Maria Auxiliadora
