BOBONARU, 24 Juñu 2025 (TATOLI)—Implementasaun Programa Nasionál Dezenvolvimentu Suku (PNDS) siklu hitu tinan 2025 iha suku Ritabou, postu administrativu Maliana, munisípiu Bobonaru prioriza konstrusaun estrada rurál iha aldeia Mole-Anan liga ba área Male-Ubu ho totál distánsia besik kilómetru tolu ne’ebé fó benifisiu ba komunidade uma kain 150-resin.
Xefe suku Ritabou, Maximiano dos Santos Araujo, konfirma projetu ne’e sei halo lansamentu fatuk dahuluk iha fulan-Juñu ne’e nia rohan.
Notísia Relevante: Autoridade Bobonaru lansa primeira pedra konstrusaun irrigasaun Genumatan Ritabou
“Ita ho tékniku sira ba sukat ona ita hein implementa iha fulan ida-ne’e, tanba agora halo hela Quotasaun ba Fornesedór sira atu fornese materiál ne’ebé mak presiza hodi halo servisu ne’e,” Nia informa ba Jornalista sira iha nia kna’ar fatin, tersa ne’e.
Xefe aldeia Mole-Anan, Aquito Letto, sente orgullu no hoto’o agradesementu ba Governu tanba durante tinan 20-resin ona maibé komunidade halerik tebes kona-ba estrada.
“Liuhusi programa PNDS nian bele lori sai uitoan ita komunidade husi situasaun ne’ebé sempre mosu iha tempu udan. Estrada ne’e implementa agora di’ak ona tanba estrada ne’e liga kedas ho ita-nia dalan protokolu Maliana. Se di’ak ona bele fasilita ita-nia komunidade lori produtu lokál ba merkadu,” nia dehan.
Xefe aldeia ne’e mós husu ba ekipa PNDS atu aselera prosesu implementasaun projetu PNDS, nune’e obra ne’e labele atraza.
“Ami-nia komunidade sira sempre ezije dehan bainhira, ha’u dehan ba sira dehan ita hein tanba buat hotu prosesu maibé parte kompetente mós tenke buka meiu oinsá para bele halo ona. Se implementa iha Jullu ho Agostu mak ita haree ba ita-nia klima ne’e komesa udan. Depois tipu projetu ne’e fulan tolu de’it mak ami-nia atividade ne’e la hotu. Kadavés sira dehan tempu liu ona osan ne’e tenke fila ba kofre Estadu. Ida-ne’e ami mak tarde ka husik ekipa mak tarde,” nia rekomenda.
Enkuantu obra ne’e sei gasta orsamentu rihun $36 inklui orsamentu operasionál.
Notísia Relevante: OJE 2025 ba Bobonaro la sufisiente atu responde preokupasaun iha baze
Jornalista : Sergio da Cruz
Editór : Cancio Ximenes
