KOVALIMA, 26 Juñu 2025 (TATOLI) – Ministériu Petróleo no Rekursu Minerál (MPRM) lori Inspesaun Jerál Estadu (IGE) ho auditór sira husi liña ministeriál sira hodi observa dezenvolvimentu iha munisípiu Kovalima.
Ministru Petróleo no Rekursu Minerál, Francisco da Costa Monteiro ho ekipa iha Kovalima, hala’o vizita ba fatin sira hanesan mina matan iha Suai Loro no mós konstrusaun rezidénsia uza tizolu ba komunidade ne’ebé afetadu ba konstrusaun Aeroportu Comandante Em Chefe Kay Rala Xanana Gusmão, iha Holbelis.
“Ha’u sente tempu oportunidade di’ak ba sira atu bele apresia saida mak la’o ona iha munisípiu Kovalima, ita hahú iha tinan barak dezenvolvimentu infraestrutura balun. Ita kontinua aposta dezenvolve Suai Supplay base (baze fornesimentu Suai) auto-Estrada”, Ministru Francisco da Costa Monteiro dehan ba jornalista iha aeroportu Suai, ohin.
Notísia relevante: https://tatoli.tl/2025/04/10/konstrusaun-uma-63-ba-familia-afetadu-aeroportu-suai-atinje-ona-21/
Membru Governu ne’e dehan, dezenvolvimentu ne’ebé mak hala’o ona iha Kovalima sai hanesan ezemplu hodi bele hatudu ba inspetór jerál ho auditór sira.
Ministériu la’os foin mak hala’o vizita maibé hala’o bebeik ona maske seidauk di’ak liu bele demostra mós ba bainaka nasionál ho internasionál.
Iha Kovalima bele haree mós bairru foun, fatin perfurasaun mina matan sira no dezenvolvimentu infraestrutura sira seluk ne’ebé mak la’o hela.
“Vizita ida-ne’e kontinua dezenvolvimentu husi setór petróleo no minerál ami hakarak projeta mensajen katak los saida mak sosiedade rona kampu ne’ebé prodús mak Bayu Undan maske para ona produsaun maibé ita kontinua halo esforsu”, nia esplika.
Fó hanoin fali katak Aeroportu Comandante Em Chefe ne’e inaugura hosi Eis-prezidente repúblika Francisco Guterres Lú Olo iha loron 20 Juñu 2017. Konstrusaun aeroportu ne’e hahú iha tinan-2014, hosi empreza Indonézia, PT Waskita Karya, ho investimentu besik millaun 86.7 USD.
Enkuantu, Mina iha Suai Loro, Timor oil hahú halo perfurasaun iha tinan-1962 ne’ebé tau besi iha 1972.
Notísia relevante: https://tatoli.tl/2025/03/28/konstruisaun-aero-portu-suai-apoiu-operasaun-projetu-ssb/
Jornalista:Celestina Teles
Editór: Rafael Ximenes de A. Belo
