VIKEKE, 27 Juñu 2025 (TATOLI)—Deputadu husi bankada Kongresu Nasionál Rekonstrusaun Timor-Leste (CNRT, sigla portugés), Domingos Augusto “Deker”, no bankada Partidu Libertasaun Populár (PLP), Hermenegilda da Costa Laurentina, husu Governu atu aselera prosesu infraestrutura hanesan estrada iha munisípiu Vikeke, atu nune’e povu bele asesu lori sira-nia produtu lokál bá merkadu.
Notísia Relevante: Kaleidoskópiu: Infraestrutura Estrada Lugatohi Viqueque
Deputadu bankada Governu, Domingos Augosto ‘Deker’ hateten, reprezenta povu fó atensaun nafatin ba Governu liuhusi Ministériu Obras Públika (MOP) hodi bele aselera prosesu infraestrutura liuliu estrada sira iha munisípiu Vikeke.
“Ami-nia dever ida mak ko’alia povu nian difikuldade sira-ne’ebé enfrenta, liuliu ba infraestrutura estrada nasionál, estrada munisipál, urbana no rural,” Deputadu Domingos Augusto “Deker” hateten ba jornalista sira, hafoin halo fiskalizasaun ramata, iha edifísiu komandu Polísia Nasionál Timor-Leste (PNTL) munisípiu Vikeke, ohin.
Nia hatutan, membru parlamentu nasionál nia papel mak nafatin bolu atensaun ba ministériu kompetente hanesan MOP bazeia ba orsamentu jerál estadu (OJE) ne’ebé aprovadu, sira bele aselera prosesu infraestutura no hein katak tinan ida-ne’e ka tinan oin bele iha progresu hodi responde ba povu Vikeke nia preokupasaun ba estrada sira iha munisípiu Vikeke.
Aleinde ne’e, membru PN husi bankada opozisaun PLP, deputada Hermenegilda da Costa Laurentina, haktuir estrada iha munisípiu Vikeke ne’e nia nkondisaun grave tebes hahú husi Asalaitula, Vikeke Vila, Uatulari, Uatukarbau no Lakluta difikulta komunidade lori sira-nia produtu lokál ba asesu merkadu.
“Ami haree estrada ne’ebé di’ak ne’e husi Ossú to’o Vikeke Vila de’it. Maibé, área Asalaitula, Vikeke Vila, Uatulari, Uatukarbau no Lakluta kontinua aat. Nune’e, ami-nia parte kontinua ezije nafatin ba Governante sira oinsá prosesa estrada iha Vikeke, atu ita-nia komunidade sente infraestrutura estrada hodi sira bele lori sira nia produtu lokál bá faan iha merkadu,” Deputada ne’e subliña.
Peokupasaun ba estrada la’ós husi komunidade de’it mak preokupa ba Estrada ne’e, maibé ema hotu-hotu hato’o nia preokupasaun tanba kondisaun estrada atuál grave liu.
“Ami sei levanta iha Parlamentu Nasionál, tanba infraestrutura ne’e importante tebe-tebes. Ba Governante sé de’it estrada sai importante, tanba estrada ne’e liga ba povu nia nesesidade. Entaun, Governu tenke esforsu hodi finaliza infraestrutura estrada sira no mandatu Governu sei tinan tolu. Ami-nia esperansa Governu tenke finaliza estrada balun iha munisípiu Vikeke liga ba postu sira,” nia dehan.
Nia fó hanoin katak, kona-ba estrada ne’e timoroan hotu-hotu mak uza estrada inklui membru Governu Konstitusionál da-sia (IX), membru parlamentu nasionál no funsionáriu sira seluk.
“Entaun estrada ne’e ita-nia preokupasaun hotu. Hanesan deputada sei hakilar nafatin ba Governante sira hodi rezolve kondisaun estrada sira-ne’ebé oras-ne’e aat,” nia hateten.
Tuir observasaun atuál kondisaun estrada husi Asalaitula, Vikeke Vila, Lakluta, Uatulari no Uatukarbau estrada nakonu ho taho no bee nalihun iha Estrada klaran bainhira udna mponu rai. Entaun, ida-ne’e mak sai difikuldade ba komunidade husi postu bainhira hala’o viajen ba munisípiu Vikeke.
Notísia Relevante: SMOP Vikeke propoin ona estrada diresaun Uatukarbau-Uatulari ba nasionál
Jornalista : Vitorino Lopes da Costa
Editór : Cancio Ximenes
