KOVALIMA, 30 Juñu 2025 (TATOLI) – Formadór sira husi Sekretáriu Estadu Formasaun Profesionál no Empregu (SEFOPE) Kovalima, finaliza ona teste entrevista ba kandidatu traballadór Austrália ne’ebé tuir kursu dalén Inglés faze daruak, iha sentru formasaun SEFOPE iha Kovalima.
Diretór SEFOPE Munisípiu Kovalima, Stefanos Segundo Manek informa katak kandidatu traballadór air ne’ebé tuir formasaun dalén Inglés ba faze daruak ne’e hamutuk 234 ne’ebé finaliza ona tuir formasaun no foin lalais ne’e kandidatu traballadór sira tuir ona teste entrevista atu hetan númeru referénsia.
“Tuir dadus ne’ebé mak ami rejista, kandidatu traballadór ne’ebé tuir formasaun dalén Inglés iha sentru formasaun hamutuk 234 maibé kandidatu traballadór 221 mak tuir teste entrevista no na’in-13 la tuir”, Stefanos Segundo Manek dehan ba TATOLI, iha Tabakolot, ohin.
Notísia relevante: https://tatoli.tl/2025/05/16/kandidatu-traballador-australia-200-resin-tuir-teste-entrevista-iha-sefope-kovalima/
Kandidatu traballadór Austrália ba faze daruak ne’e hala’o durante loron tolu – hahú loron 23 no finaliza iha loron 25 Juñu ne’e.
Razaun kandidatu traballadór na’in-13 la tuir teste entrevista, tanba balun hetan ona servisu no balun tuir kursu dalén Inglés to’o de’it klaran ho nune’e mak kandidatu traballadór la tuir teste entrevista faze ba daruak nian.
Formadór sira fó teste entrevista ba kandidatu sira la’ós katak atu ba kedas Austrália maibé sei prepara dadus hodi submete ba nasionál, nune’e sira bele hetan númeru referénsia. Prosesu atu hetan númeru referénsia ne’e mak presiza rekapitula kandidatu traballadór sira-nia dokumentu ho rezultadu teste hafoin bele kompleta dokumentu.
Dokumentu ne’ebé mak kandidatu traballadór presiza atu kompleta tan mak hanesan pasaporte, bom komportamentu, kartaun eleitorál, númeru kontaktu no presiza atu atualiza mós E-mail (Koreiu elektróniku) bainhira kandidatu traballadór sira troka ona.
Maria Imaculada dos Santos hanesan Kandidatu Traballadór ida espresa nia sentimentu tanba bele hetan númeru referénsia husi SEFOPE rasik.
“Ha’u sente kontente tanba bele tama ona faze teste entrevista nune’e ha’u bele hetan númeru referénsia hodi hein prosesu atu ba servisu iha Austrália tanba atu ba servisu iha Austrália tenke liuhusi prosesu”, nia hato’o.
Fó hanoin fali katak kanditutu traballadór faze ba dahuluk ne’ebé tuir teste entrevista durante loron tolu – hahú iha 14 Maiu no finaliza ona loron 16 Maiu hamutuk na’in-229.
Notísia relevante: https://tatoli.tl/2025/04/23/sefope-entrega-sertifikadu-ba-kandidatu-traballador-australia-nain-255/
Jornalista:Celestina Teles
Editór: Rafael Ximenes de A. Belo
