VIKEKE, 01 Jullu 2025 (TATOLI)—Xefe suku Afalokai, postu administrativu Uatukarbau, munisípiu Vikeke, Abilio Soares, informa irrigasaun ba natar iha fatin haat iha suku Afaloikai, postu Uatukarbau kondisaun aat, nune’e komunidade halo ka halai natar depende de’it ba udan-been.
Notísia Relevante: MAPPF ho Empreza Xineza asina akordu ba konstrusaun Irrigasaun Irabere
“Durante ne’e, ami agrikultór sira preokupa tebes ba irrigasaun tanba ami-nia irrigasaun ne’ebé oferese bee ba natar iha fatin haat ne’e kuaze tinan barak ona kondisaun aat. Kada tinan, ita-nia agrikultór sira halo natar maibé komunidade uza de’it udan-been foin halo natar. Kuandu udan mai tarde, entaun komunidade halai natar mós tarde. Tan ne’e, ida-ne’e difikulta ba ita-nia agrikultór sira,” Abilio Soares hateten ba Agência Tatoli, iha postu Uatukarbau, ohin.
Tanba ne’e, autoridade Afaloikai husu Governu liuhusi Ministériu Agrikultura, Pekuária, Peska no Floresta (MAPPF) tau matan ba irrigasaun ba natar fatin haat iha suku Afaloikai, atu komunidade agrikultór sira halo sira-nia natar.
“Ha’u hakarak husu MAPPF hodi tau matan ami-nia irrigasaun ne’e kondisaun aat, atu ita-nia agrikultór sira halo natar hodi hasa’e produsaun hare iha rai-laran. Kada tinan ita-nia Governu dehan hasa’e produsaun, maibé kondisaun infraestutura sei aat hela, oinsá ita hasa’e produsaun,” nia hateten.
Nune’e, nia prefere ba Governu hodi konstrui irrigasaun ne’e fornese bee ba natar iha Ulubui Uaisau ektare 100, Laudau Levakravi ekatre 80 no Uaikairubi 80, tanba natar ne’e benifísia ba populasaunAfaloikai, Bahatata no suku Loihulu no komunidade Uani Uma.
Hatán ba preokupasaun autoridade Uatukarbau ba animál moras, Sekretáriu Estadu Floresta (SEF), Fernandino Veira da Costa, hateten kona-ba irrigasaun sira iha suku Afaloikai ne’ebé kondisaun Governu nafatin toma nota.
“Kona-ba autoridade sira-nia preokupasaun ba irrigasaun sira iha suku Afaloikai ita sei tau ba toma nota. Bainhira Governu halo irrigasaun sei sura mós kuantidade komunidade hira mak atu utiliza irrigasaun. Nune’e, ba rekomendasaun sira-ne’e ha’u sei releta ba ministru hodi haree asentu irrigasaun,” nia dehan.
Aleinde ne’e, Governante ne’e fó sai polítika MAPPF nian ne’ebé tinan ida-ne’e sei tau príoridade ba irrigasaun boot sira hanesan irrigasaun Iraberre Uatukarbau no irrigasaun Maliana 2 nian ne’ebé sei konstrui iha tinan ida-ne’e.
“Ami sei hadi’a irrigasaun ne’ebé mak volume konstrusaun boot, hanesan irigasaun volume kiik sira-ne’e MinistériuAdministrasaun Estatál (MAE) bele responde liuhusi diresaun Programa Nasionál Dezenvolvimentu Suku (PNDS) no Programa Integradu Dezenvolvimentu Munisipál PIDM,” nia hateten.
Notísia Relevante: MAPPF Vikeke tetu natar foun ektare 120 iha área Dardau-Vessoru
Jornalista : Vitorino Lopes da Costa
Editór : Cancio Ximenes
