MOP selu ona millaun $4,3 ba vítima despeju administrativu no alargamentu estrada
DILI, 01 Jullu 2025 (TATOLI) – Ministériu Obra Públika (MOP) daudaun halo ona indemizasaun bá vítima afetadu despeju administrativu no alargamentu estrada hamutuk uma-kain 526 ho totál orsamentu millaun $4,3.
Diretór-Jerál Administrasaun no Finansa iha MOP, João Amaral, hateten husi totál família sira-ne’e 264 iha Fomentu II, Bidau Senggol 86, Fomentu I 71, Bebonuk 69, Kuluhun 19, Bairru-Pité/Andevil (ADN Hudi Laran) 15, Aimutin rua, Baukau no Kovalima kada ida.
Aleinde ne’e, MOP mós prosesa hela pagamentu ba família afetada 358 iha Dili ho totál orsamentu millaun $2,3.
Sira ne’e mai husi Bairru-Pité/Andevil (ADN Hudi Laran) uma-kain 11, Bidau Santa Ana-Manu Mata 14, Alto Balide 3, Komoro Moris Foun 117, Bebonuk Tasi-Ibun 75, Kuluhun 23, Fomentu I 52, Bidau Sengol rua, Aitarak-Laran 61.
Kona-ba vítima afetada ba alargamentu estrada husi Bekora nian daudaun seidauk bele halo pagamentu, tanba sei halo verifikasaun ba dadus no bainhira hotu kontinua ho asina termu aseitasaun hafoin halo indemizasaun.
Iha sorin Ministru Obras Públika, Samuel Marçal, husu ba vítima afetada sira ne’ebé seidauk simu indemizasaun atu pasiénsia uitoan, tanba ekipa téknika sira kontinua esforsu iha terrenu hodi kompleta dokumentu sira atu halo pagamentu.
“Ita hotu hakarak buat hotu lalais, maibé ita mós hatene katak serbisu ho sistema, entaun tenke la’o tuir sistema”, konklui.
Notísia relevante: MOP indemniza família afetada 487
Jornalista: Arminda Fonseca
Editora: Maria Auxiliadora
