KOVALIMA, 02 Jullu 2025 (TATOLI)- Diretór Servisu Saúde Munisípiu Kovalima, Domingos Sequeira informa katak iha Juñu ne’e Servisu Saúde Kovalima rejista pasiente na’in-ida pozitivu ho moras malária, iha aldeia Sanfuk, suku Kamnasa, Postu administrativu Suai, Munisípiu Kovalima.
“Iha loron 16 ka 17 Juñu ne’e ami servisu saúde Kovalima deteta pasiente ida pozitivu ho moras malaria la’ós mai husi lokál maibé importadu husi nasaun viziñu Indonézia”, Domingos Sequeira dehan ba TATOLI, iha resintu AMC, ohin.
Ho identifikasaun moras referida, daudaun ne’e pesoál saúde sira kontinua halo triajen teste raan masál, rega ai-moruk hodi hamate susuk atu nune’e labele kontinua hada’et moras malária ba sidadaun sira seluk.
Dirijente saúde ne’e dehan, bazeia ba estudu balun dehan, atu halo prevensaun ba moras malária, pesoál sira uza termu 2510, ne’ebé signifika, númeru rua (2) ne’e katak durante loron-rua pesoál saúde identifika fatin, númeru lima (5) signifika halo triajen (screening) hasai raan masál hodi halo teste iha área ne’ebé afetadu moras malária, hahú husi uma pasiente to’o kilo ida-resin no númeru 10 ne’e katak iha loron 10 halo prevensaun rega susuk.
Notísia relevante:Tempu badak, peritu malária sei sertifika kestaun eliminasaun malária
Pasiente ne’ebé mak pozitivu moras malária ne’e nu’udar traballadór ne’ebé servisu iha konstrusaun ponte Maliloek ne’ebé lokaliza iha aldeia Sanfuk, suku Kamnasa, Postu administrativu Suai, Munisípiu Kovalima.
Pesoál identifikadu pozitivu moras malária ne’e, daudaun ne’e nia kondisaun rekuperadu ona tanba hemu hela ai-moruk.
Hafoin halo tratamentu ba pasiente , pesoál saúde mós hanoin oinsá atu halo prevensaun susuk ne’ebé moris iha aldeia Sanfuk, rega ai-moruk hodi hamate susuk nune’e labele hada’et moras malária ba ema seluk.
Sintoma malária
Sintoma klásiku husi moras malária mak hanesan, isin-manas, ulun moras no sente malirin. Tipikalmente, moras ne’e mosu iha loron da-10-15 depois-de hetan tata hosi susuk infetadu.
Fó hanoin fali katak iha fulan-Jullu to’o fulan-Outubru 2023, Servisu saúde Munisípiu Kovalima rejista pasiente ho moras malária na’in-sia, husi Suku Lalawa ho Beisesuk, Postu administraivu Tilomar, Munisípiu Kovalima bainhira pasiente sira hala’o konsulta iha sentru saúde Tilomar.
Moras malária ne’ebé rejistadu hosi pesoál saúde sira iha Kovalima ne’e konsideradu importa husi Indonézia hamutuk na’in-20 resin. Sira hela iha aldeia Ai-oan, hela durante semana-ida bainhira mai halot mate isin iha postu Tilomar, hafoin komunidade hetan moras malária.
Notísia relevante:Pasiente raiva husi Kovalima hakotu ona iis iha HNGV
Jornalista:Celestina Teles
Editór: Rafael Ximenes de A. Belo
