DILI, 03 Jullu 2025 (TATOLI)—Ministériu Justisa (MJ) nia esforsu durante tinan rua iha Governu KOnstitusionál da-sia (IX) nia ukun, kontinua fó prioridade hodi reforma enkuadramentu legál ba vizaun ka programa reforma setór justisa ninian liuliu reforma iha enkuadramentu legál sira iha dezenvolvimentu institusionál infranstrutura no mós iha rekursu umanu.
Notísia Relevante: Ministru Justisa defende reforma justisa ne’ebé hasa’e kualidade no koñesimentu pesoál
Ministru Justisa, Sérgio Hornai, hateten durante mandatu Governu Konstitusionál da-sia (IX) ne’e nia parte sei nafatin esforsu hodi halo koordenasaun institusionál liuliu husi autoridade kompetente no orgaun Estadu ninian hanesan órgaun tribunál sira, atu buka oinsá bele haree kona-ba Ministériu Justisa nia vizaun ka programa reforma setór justisa nian.
“Liuliu reforma iha enkuadramentu legál sira iha dezenvolvimentu institusionál infranstrutura no mós iha rekursu umanu,” Ministru Justisa ne’e informa ba jornalista sira hafoin rama reuniaun Konsellu Ministru iha Palásiu Governu, kuarta ne’e.
Governante ne’e relata, aleinde ne’e iha perspetiva seluk mak prestasaun ida ho kualidade iha kada instituisaun ida-idak ninian ba iha sidadaun sira, nune’e ema hotu buka esforsu hamutuk atu bele lori asesu justisa ida-ne’ebé asesivél liu, tantu iha perspetiva administrativa no mós iha asaun judisiáriu ninian hodi bele fó satisfasaun ba sidadaun sira.
“Hanesan Ministru Justisa ne’ebé hola parte iha Governu Konstitusionál da-sia (IX) hamutuk ho membru Governu sira seluk husi instituisaun direta ka instituisaun indireta, atu buka esforsu hodi halo prestasaun servisu ne’ebé kualidade iha setór justisa ninian,” nia hateten.
Nia informa, nia parte halo hela normalizasaun iha servisu atendementu pasaporte públiku, lori balkaun úniku ba besik iha komunidade maske sei iha hela sasidik (difikuldade) balun tanba hanesan instituisaun ne; e lahalo buat hotu-hotu no dezeñu ho perfeitu iha tempu badak.
“Maibé, ita konsolida ona no hatuur prestasaun ida besik-liu ba komunidade liuhusi polítika asesu justisa administrasaun ne’ebé ita halo,” nia haktuir.
Nia esforsu atu prepara tribunál sira sira hanesan defensória públika, ofisiál justisa, Ministériu Públiku no tribunál sira sei halo alargamentu to’o iha munisípiu sira.
“Sei haree mós kona-ba estabelesimentu orgaun tribunál ne’ebé aas liu mak tribunál supremu justisa ne’ebé sai hanesan espetativa ida ba demanda konstituisaun lei organizasaun judisiáriu ninian,” nia hateten.
Tanba, nia dehan, ko’alia kona-ba polítika reforma ninian mak MJ prepara hela rekursu umanu ida-ne’ebé bele servisu durante tinan naruk, hanesan halo rekrutamentu ba estudante sira-ne’ebé foun no integra iha departamentu direitu hodi sai rekursu ne’ebé iha lisensiatura direitu.
Notísia Relevante: MJ prepara ona ezbosu lei 20-resin ba reforma justisa
Jornalista : Alexandra da Costa
Editór : Cancio Ximenes
