OEKUSI, 04 Jullu 2025 (TATOLI) – Sekretária Rejionál ba Asuntu Agrikultura hamutuk ho autoridade lokál sira kolleta hare membramo hamutuk ektare 15 iha natar área Nunuhenu suku Cunha sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Notísia relevante:Agrikultura RAOEA fasilita tratór unidade haat bá fila-rai iha natar Nunuheno
Sekretária Rejionál ba Asuntu Agrikultura, Filomena Sila, hateten, natar ektare 15 ne’e, abandona tinan haat ona dezde 2021 tanba hetan estragu husi mota hodi estraga irrigasaun inklui natar sira nakonu ho rai-henek, nune’e Autoridade RAEOA liuhusi serbisu agrikultura Oekusi halo intevensaun liuhusi hasai rai-henek, hadi’a irrigasaun no apoia tratór, hodi halai fali iha 2025 ne’e.
“Ami simu pedidu husi agrikultór sira, depois ha’u koordena ho obra públika mai hasai sedimentasaun no ke’e fali irrigasaun hodi fasilita bee-mota tama ba natar sira, ne’ebé ita agradese tanba fulan tolu liubá ita mai lansa , ohin ita mai kolleta ba ektare 15 envolve natar na’in-63,ba crop-cutting (ko’a hare) ne’ebé hala’o ona Prátika Agrikultura Di’ak (PAD) rezultadu mak ita hetan tonelada 3,9 kada ektare no konvensionál hetan tonelada 3,8 kada ektare” Filomena sira dehan iha Nunuhenu, Oekusi, ohin.
Nia informa, durante ne’e ba Prátika Agrikultura Di’ak, uza adubu orgániku rua hanesan AMO no adubu úrea, ba konvensionál la utiliza tanba atu halo komparasaun.
“Tuir loloos nia tonelada ne’e sa’e liután, maibé natar sira-ne’e abandona tinan haat ona, dezde 2021 to’o 2025 ne’e mak foin halai fila-fali, entaun rai ne’e sei rekupera fila-fali to’o 2026 ba oin bele sa’e ona,” nia informa.
Notísia relevante:Natar sira iha suku Cunha presiza irrigasaun no konstrui gabiaun
Gaspar Anin, nu’udar natar na’in, hato’o agradesimentu ba Autoridade RAEOA tanba tinan ne’e bele hahú fali natar sira hafoin hetan estragu iha tinan haat liubá, no konsege kolleta nia rezultadu.
“Ha’u lori komunidade sira agradese ba autoridade. Ha’u hakarak informa katak, durante tinan haat natar sira-ne’e abandona dezde 2021 tan ne’e mak foin daudaun, ami ba husu apoia no ohin ita halo ba tratór, fini no adubu, ne’ebé Governu hadomi loos ami, ami husu ba futuru tau matan nafatin mai ami, tanba ida-ne’e ami-nia bikan atu moris,” nia rekomenda.
Notísia relevante:Autoridade RAEOA rega adubu orgániku ba natar ektare 77 iha Naktuka
Entretantu, totál natar sira iha suku Cunha hamutuk ektare 231,5 ho benefisiáriu hamutuk 794 iha fatin hitu mak konsege halai natar iha 2025 ne’e, mak hanesan, natar Tono-Petun ektare 42,1, Nunuhenu ektare 15, Fatununi ektare 13,3, natar sira iha Roti ektare 6,6, Maun-Oef ektare 44,6, Sonamnasi ektare 61,6, Sobe ektare 35.
Jornalista: Abílio Elo Nini
Editór: Rafael Ximenes de A. Belo
