DILI, 05 Jullu 2025 (TATOLI)—Sekretária Estadu Kooperasaun (SECoop, sigla portugés) liuhusi Diresaun Nasionál Planeamentu Integradu Produsaun Jestaun Kooperativa liuhusi Xefe Departamentu Multisetorál, Rui Soares, hateten mánutrisaun ne’e iha tanba komunidade mak dependénsia liu ba hahan importasaun duké produtu lokál.
Xefe Departamentu multisetorál SECoop, Rui Soares, informa aihan nutritivu sira-ne’e mak ita-nia produtu lokál sira, tanba riku ho vitamina no karbohidratu ne’ebé boot kompara ho hahan importasaun ne’ebé dalaruma kontamina ho kímika
“Komunidade tenke iha koñesementu kle’an kona-ba hahan nutritivu atu evita mánutrisaun, maibé tanba komunidade laiha konsiénsia no ladun iha informasaun kona-ba asuntu ne’e mak sira gosta liu konsumu hahan importasaun. Aleinde ne’e, dalaruma mós fatór ekonomia ne’ebé ladun sufisiente ba sira atu sosa hahan nutritivu seluk,” Xefe Departamentu ne’e relata ba jornalista, iha edifísiu TATOLI, Faról, ohin.
Xefe Rui informa, tanba ne’e mak Sekretária Estadu Kooperasaun iha ninia polítika tau prioridade ba koperativa ortikultura (kuda modo, haki’ak ikan, haki’ak animál) hodi hasees ka kombate mánutrisaun iha rai-laran, grupu kooperativa ortikultura daudaun ne’e SECoop rejista hamutuk nain-50.
“Parte seluk mós ba agrikultor sira atu servisu maka’as kuda produtu lokál hodi domina iha merkadu duké hahán importasaun mak domina liu,” nia dehan..
Nia hateten, Governu sei esforsu servisu hamutuk ho liña ministeriál seluk inklui parseria internasionál sira hodi hadi’a mánutrisaun iha Timor, tanba ne’e husu ba ministéria relevante hanesan Ministéria Saúde no organizasaun internasionál atu servisu hamutuk ho Autoridade Munisipál sira hodi sensibiliza informasaun kona-ba konseitu no benefísiu husi hahan nutritivu ba komunidade sira hodi evita má nutrisaun.
Notísia Relevante: “Di’ak-liu lakon osan sosa aihan nutritivu duké lakon vida tanba mánutrisaun”
Jornalista : Alexandra da Costa
Editor : Cancio Ximenes
