DILI, 07 Jullu 2025 (TATOLI)—Governu tenke fó prioridade ba setór edukasaun iha programa Planu Estratéjiku Dezenvolvimentu Nasionál (PEDN) 2021-2030 atu kapasita lideransa ba estudante sira.
Notísia Relevante: Tatoli-UNITAL organiza diskusaun kona-ba Konseitu Estadu no Vizaun Estratéjika
“Iha PEDN ne’ebé liga ba setór edukasaun iha ninia papél oinsá atu kapasita lideransa ba estudante sira,” Reitór Universidade Orientál Timor Lorosa’e (UNITAL), Claudino Ninas Nabais, informa ba Ajénsia Tatoli hafoin semináriu nasionál ne’ebé organiza husi Agência Tatoli servisu hamutuk ho UNITAL ho tema “Konseitu Estadu no Vizaum Estratéjika ba Dezenvolvimentu Nasionál”, iha salaun UNITAL, Bekora, ohin.
Planu Estratéjia Dezenvolvimentu Nasionál (PEDN) ne’e, nia dehan, bainhira iha progresu ka lae ne’e depende ba konsisténsia lideransa Governu ninian ne’ebé bele atinje tuir meta iha tinan 2030.
“Buat sira-ne’e hotu atu la’o di’ak ka ladi’ak ne’e depende ba lideransa sira-nia kompromisu. Tanba, ita haree katak iha setór balun mak sei sai fraku hela liuliu iha setór edukasaun,” nia dehan.
Tanba ne’e, nia husu Governu tenke apoia nafatin universidade sira iha Timor-Leste liuhusi orsamentu subvensaun públika, nune’e universidade sira iha kompromisu ne’ebé forte sai xave edukadór
“Ho barreira sira-ne’e, fó impaktu ba universitáriu sira hodi atinje hanesan universidade ne’ebé kualifikadu liu iha 2030,” nia esplika.
Aleinde ne’e, nia reforsa, tanba Timor-Leste mós atu sai membru ofisiál ASEAN iha fulan-Outobru mai, entaun Timor-Leste iha demanda no iha rekezitu lubuk ida-ne’ebé universidade sei prienxe hanesan kualidade ensinu superiór iha nasaun Ásia nian.
Nia informa, daudaun ne’e mak Universidade Oriental Timor Lorosa’e (UNITAL) hola papél importante hodi eduka estudante sira, nune’e sai rekursu ne’ebé intelektuál hodi serbí nasaun ida-ne’e.
Notísia Relevante: TATOLI no UNITAL asina akordu kooperasaun servisu hamutuk
Jornalista : Alexandra da Costa
Editór : Cancio Ximenes
