DILI, 09 Jullu 2025 (TATOLI) – Federasaun Kooperativa Kréditu Hanai Malu (FCCHM, sigla portugés) halibur ona kapitál millaun $22 husi Kooperativa Kréditu Uniaun 47, atu fó asesu finanseiru ba membru rihun 22 iha Timor-Leste.
Harii iha tinan 2010, Federasaun ne’e kontinua fó formasaun ba jerente kooperativa sira ho apoiu internasionál, hodi fortalese sustentabilidade institusionál no dezenvolvimentu finanseiru komunidade nian.
“Formasaun ne’ebé ami halo ne’e ho karáter internasionál ho tema ko’alia kona-ba Dezenvolvimentu Organizasaun [OD, sigla inglés], atu asegura sustentabilidade institusionál”, Prezidente Kooperativa Kréditu Hanai Malu, Elizário Ferreira, informa ba Tatoli.
Métodu ne’ebé uza iha formasaun ne’e mak PEARLS – Protesaun, Estrutura Finanseira Efetivu, Kualidade Ativa, Taxa Retornu no Kustu, Likidéz no Sinál Kreximentu. Sistema PEARLS ne’e métodu ne’ebé uza iha kooprerativa sira iha mundu tomak no adota husi Vocal Credit Union (VCO).
Elizário Ferreira hateten kooperativa kréditu reprezenta papél importante hodi fó asesu finanseiru ba sidadaun hotu atu iha oportunidade halo kréditu.
Maski Federasaun Hanai malu dezenvolve an ona, maibé nafatin enfrenta dezafiu sira, liuliu kompetisaun ho Governu. “Dalaruma ami hala’o kooperativa tuir prinsípiu internasionál, maibé Governu kuda batar [la envolve kooperativa no] tuir fali sira-nia hakarak. Entaun sai ona husi prinsípiu kooperativa nian”, nia lamenta.
Tuir Konstitusaun RDTL, iha artigu 50 hateten Estadu promove kriasaun kooperativa ne’e katak se Governu ida tutela ba kooperativa, normalmemte nia halo promosaun la’ós nia bá halo fali produsaun. “Nia só promove, eduka, no kria kondisaun no organiza”, Elizário afirma.
Iha artigu 138 ko’alia klaru katak organizasaun ekonómika Timor-Leste konjuga forma tolu ho inisiativa komunitária, katak komunidade iha inisiativa nia hato’o ba Estadu iha devér atu ba hanorin, organiza oinsá moris hanesan kooperativa ida tanba ida-ne’e papél Governu nian.
Notísia relevante: Federasaun Hanai Malu promove formasaun hodi fortalese kooperativa kréditu sira
Jornalista: Arminda Fonseca
Editora: Maria Auxiliadora
