DILI, 10 Jullu 2025 (TATOLI)—Treinadór Federasaun Taekwondo, Kim ki Tae konfesa atleta na’in-haat menus try out antes partisipa iha jogu Komunidade Nasaun Lian Portugés (CPLP-sigla portugeza) tanba tempu limitadu.
Kim ki Tae tenik mezmu menus try out, atleta na’in-haat halo preparasaun másima no durante semana ida-ne’e bá-oin sei kontinua halo preparasaun liuliu relasiona ho atleta nia kondisaun.
“Antes jogu presiza prepara atleta sira-nia kondisaun, tenke han no deskansa di’ak,” Kim Ki Tae informa ba TATOLI iha Otél Ramelau, Aimutin, Dili, kinta ne’e.
Notísia relevante: Atleta Taekwondo preparada partisipa jogu CPLP
Kim rekoñese atleta husi nasaun Brazíl sai adversária séria maibé ida-ne’e la’ós sai barreira ba atleta Taekwondo husi Timor-Leste.
“Ha’u garante atleta na’in-haat husi Taekwondo ninia prestasaun di’ak,” Kim argumenta.
Timor-Leste nia modalidade Taekwondo ne’ebé praparadu ba jogu referidu hamutuk na’in-haat kompostu husi mane-rua kategoria klase kilógrama 51 no 55, enkuantu feto-rua iha kategoria kilógrama 46 no 49.
Jornalista: Natalino Belo
Editór: Xisto Freitas da Piedade
