DILI, 11 Jullu 2025 (TATOLI)—Centro Nacional Chega, Institutu Públuku (CNC, I.P), sesta ne’e, asina akordu ho Fundu Dezenvolvimentu Kapitál Umanu (FDCH, sigla portugés) hodi atribu bolsa estudu ba sobrevivente nia oan na’in-10 atu kontinua sira-nia estudu iha UNTL, UNPAZ, UNITAL, DIT no ISC.
Diretór Ezekutiva CNC, I.P, Hugo Maria Fernandes, hateten asina akordu entre CNC ho universidade sira sai hanesan parseiru hodi implementa matéria istória ba estudante sira.
“Bolseiru sira-ne’e husi sobrevivente nia oan sira no ita hili família sobrevivente ne’ebé mak vulneravél liu no ekonómia la sufisiente hodi kontinua tau matan ba nia oan sira ba eskola,” Diretór Ezekutivu ne’e informa ba jornalista sira hafoin serimonia asina kontratu ne’ebé hala’o iha ámbitu selebrasaun aniversáriu Centro Nacional Chega, Institutu Públiku (CNC, I.P) ba da-ualu (8) ho tema “Memória Koletiva Dalan ba Rekonsiliasaun”, iha Antigu Komarka Balide, ohin.
Parseiru universidade sira-ne’e iha Dili laran de’it no seidauk halo kooperasaun ho universidade ba rai-li’ur tanba presiza haree ba fundu, maibé bolseiru sira-ne’e sei kontinua eskola iha ensinu superiór to’o ramata.
“Totál bolseiru ne’ebé CNC apoiu hamutuk 26 ona no tinan ne’e ita fó tan ba bolseiru na’in-10,” nia informa.
Aleinde ne’e la’ós Centro Nacional Chega! de’it mak fó apoiu ba bolseiru sira maibé hetan mós husi doadór balun hanesan husi Fundu Dezenvolvimentu Kapitál Umanu (FDCH, sigla portugés) no embaixada Franca.
“Fundu povu nian, fundu mai husi povu, entaun ami tenke utiliza ba povu. Tanba ne’e, ami iha esperansa atu fó ajuda ba povu ida-ne’e nia oan ne’ebé matenek,” Diretór Ezekutivu FDCH, Julio Aparicio hateten.
Nia apela ba bolseiru sira tenke utiliza fundu ne’e ho di’ak ba futuru atu fó kontribuisaun ba rai ida-ne’e.
Iha biban ne’e, CNC, I.P mós asina akordu Universidade Orientál Timor Lorosa’e (UNITAL) iha área edukasaun nian liuliu implementasaun Módulu Chega! iha UNITAL no CNC, I.P mós asina akordu ho French Cooperation iha área edukasaun no kultura nian.
Sobrevivente nia oan na’in-10 ne’ebé hetan bolsa estudu ne’e mak hanesan Januario Gomes, Domingos Coliac Barreto de Carvalho, Flora de Jesus Moniz, João Oscar Fendi Cono Maniquin, Lelia da Costa Soares, Graziela Marcal Amaral, Fortunato Lobo, Chelin Santos Pereira Amaral, Jose Joanico Artur Carvalho Sarmento Freitas no Lelinha Baquita Pereria de Jesus Saldanha.
Antes ne’e, nia relata progresu ne’ebé CNC, I.P halo ona tinan 2024 mak aspeitu prezervasaun memória, harii ona Muzeu Memóriál Munisipá lima (5) mak hanesan Museu Memoriál Munisipál Manatutu, Vikeke, Aileu, Kovalima, Bobonaru no tinan ida 2025 ne’e sei harii tan Muzeu Memoriál Munisipál Manufahi.
Jornalista : Alexandra da Costa
Editór : Cancio Ximenes
