DILI, 13 Jullu 2025 (TATOLI)—Primeiru-Ministru (PM), Kay Rala Xanana Gusmão, hamutuk ho delegasaun, Domingu ne’e, hala’o vizita ofisiál bá Singapura, hahú husi loron 13 to’o 16 Jullu 2025, hodi atende konvite husi Primeiru-Ministru Repúblika Singapura, Lawrence Wong.
“Vizita ofisiál ne’e marka tinan 23 relasaun diplomátika entre nasaun rua. Vizita ida-ne’e sai nu’udár vizita ofisiál ba dahuluk husi Primeiru-Ministru, Kay Rala Xanana Gusmão, ba Estadu-membru ASEAN ida dezde alkansa akordu iha Simeira Xefe Estadu no Xefe Governu sira ASEAN nian ba dala-46, iha Kuala Lumpur, iha fulan-Maiu, kona-ba adezaun Timor-Leste iha organizmu rejionál ida-ne’e, ne’ebé ajendadu ba Outubru 2025,” referidu nota ne’ebé Ajénsia TATOLI asesu, ohin.
Vizita ofisiál ida sei fortalese relasaun bilaterál no reforsa kooperasaun entre Singapura ho Timor-Leste.
Inísiu vizita ofisiál ne’e sei hahú iha Segunda loron 14 Jullu ho Serimónia Boas-Vindas iha Ministériu Relasaun Esteriór, tuir kedan sei hala’o enkontru bilaterál ho Primeiru-Ministru Singapura, Lawrence Wong.
PM Xanana ho delegasaun sei partisipa iha almosu ofisiál ne’ebé oferese husi Primeiru-Ministru Wong, ne’ebé asume mós pasta nu’udár Ministru Finansa Singapura nian.
Aleinde ne’e, Xefe Governu Xanana sei hala’o mós vizita kortezia bá Prezidente Singapura, Tharman Shanmugaratnam, iha Vila Palásiu Prezidensiál.
Delegasaun ne’e sei hala’o vizita bá Oseanáriu Singapura, iha Resorts World Sentosa, atu koñese di’ak liután abordajen sira husi Singapura kona-ba matéria edukasaun mariña, investigasaun no dezenvolvimentu institusionál – koñesimentu ne’ebé sei fó apoiu ba intensaun Timor-Leste hodi estabelese Sentru Edukasaun no Investigasaun Mariña ida iha Illa Ataúru.
Iha loron daruak, Tersa 15 Jullu, Primeiru-Ministru hamutuk ho delegasaun sei hala’o vizita bá Sentrál Enerjia Ambientál Cora, iha Illa Jurong.
Timor-Leste daudaun ne’e iha hela faze dezenvolvimentu, sei enfrenta dezafiu barak kona-ba kuantidade lixu ne’ebé aumenta ba beibeik husi loron ba loron no bele halo jestaun di’ak ho forma sustentável.
Notísia relevante : Singapura apoiu adezaun Timor-Leste ba ASEAN
Vizita ida-ne’e sei deskobre informasaun valioza sira kona-ba Singapura nia solusaun inovadora atu rezolve problema lixu no transforma ho solusaun enerjétika.
Delegasaun sei hala’o vizita ofisiál bá Jardins Baía, iha ne’ebá Primeiru-Ministru Xanana sei kuda ai-kameli oan. Timor-Leste sei oferese ai-kameli oan hamutuk hun 60 ba Governu Singapura hanesan prezente no sentidu omenajen ba komemorasaun aniversáriu independénsia ba dala-60.
Iha lorokraik, Primeiru-Ministru Xanana sei hato’o Palestra Públika ida hodi destaka iha Eskola Estudu Internasionál S. Rajaratnam (RSIS) ho títulu ‘Timor-Leste no ASEAN: kapítulu foun ida iha istória rejiaun nian.’
Palestra Públika ida-ne’e nu’udár Palestra ba daruak iha instituisaun prestijiada ne’e desde Xanana Gusmão hato’o palestra iha tinan 2013.
PM Xanana no delegasaun sei vizita mós Konsellu Abitasaun no Dezenvolvimentu Singapura atubele hetan informasaun kona-bá polítika abitasaun públika iha país, modelu finansiamentu ba habitasaun públika no planeamentu urbanu sosiál.
Lisaun sira ne’ebé aprendida husi susesu modelu abitasaun públika Singapura nian sei kontribui ba esforsu kontínuu sira Timor-Leste atu dezenvolve abitasaun kualidade no asesívél bá povu timoroan.
Primeiru-Ministru sei akompañadu husi membru seniór sira iha Gabinete, inklui Vise-Primeiru-Ministru, ne’ebé ezerse mós funsaun hanesan Ministru Koordenadór Assuntu Ekonómiku no Ministru Turizmu no Ambiente Francisco Kalbuadi Lay, Ministru Negósiu Estranjeiru no Kooperasaun Bendito dos Santos Freita, Vise-Ministra ba Asuntu ASEAN Milena Maria da Costa Rangel no Sekretáriu Estadu Komunikasaun Sosiál Expedito Dias Ximenes.
Tuir planu, Primeiru-Ministru Xanana Gusmão ho delegasaun sei fila hikas mai Timor-Leste iha Kuarta, 16 Jullu 2025.
Jornalista : Felicidade Ximenes
Editora : Julia Chatarina
