OEKUSI, 15 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, kompromete sei hasai sirkulár ofisiál ba negosiante Xineza sira atu labele loke tan loja no kioske iha sub-rejiaun Oésilo, Pássabe no Nítibe.
“Iha haree iha territóriu Timor-Leste, iha fatin balun, komérsiante Xineza sira, to’o de’it sede distritu, sira la tuun ba sub-distritu, iha Oekusi ha’u sei la husik negosiante Xina ba harii sira-nia loja iha foho, liuliu Oésilo Pássabe no Nítibe, tanba sira mai tenke konsentra iha kapitál Pante Makasar, depois ita-nia ema sira husi foho tuun mai hola sira-nia sasán ba fa’an fali iha sub-rejiaun sira, ida-ne’e mak loos, la’ós mai kompete fali ho ema lokál sira,” Rogério Lobato dehan, iha salaun IADE Oekusi, ohin.
Notísia relevante:AIFAESA koordena autoridade no operadór ekonómiku atu destaka funsionáriu iha Oekusi
Nia informa, razaun ne’e atu fó oportunidade ba negosiante timoroan liuliu Oekusi-oan sira atu hetan rendimentu ruma husi atividade negósiu, tanba realidade hatudu Xineza balun mós fa’an modo-tahan, sigarru, ne’ebé tuir loloos atividade ne’e kabe ba timoroan sira mak bele fa’an.
“Ha’u senti ita tenke regulariza. Ha’u sei hasai sirkulár ida, depois harii ekipa konjunta ida atu kontrola hamutuk ho AIFAESA. Se sira sa’e ba foho, ha’u sei haruka polísia ba kaptura, tanba ita haree Xineza sira komesa domina vila-laran, neneik sei sa’e to’o área rurál. Entaun, ida-ne’e bele hamate ita-nia negosiante lokál sira. Ne’ebé, sirkulár ita sei prepara atu fó ba sira hodi kumpre, ne’e ba territóriu Oekusi de’it, atu fó fatin ba timoroan sira bele mós manán osan,” nia promete.
Rogério Lobato, fó hanoin ba sidadaun hotu, atu matan moris tanba sidadaun estranjeiru balun mai ho estratéjia, hodi hola feto timoroan, depois utiliza atu sai hanesan autoridade nune’e bele sosa rai hodi bele fa’an sasán livre iha rai-laran.
“Ita tenke loke ita-nia matan, tanba mate ba rai ne’e ita mak mate, ita-nia maun alin sira uluk mate, agora ema seluk mak mai goza, ida-ne’e labele akontese. Ne’e duni, ha’u sei prepara sirkulár ida, atu hapara buat ne’e; labele fa’an to’o foho,” nia dehan.
Notísia relevante:Faan produtu liu prazu, AIFAESA taka provizóriu loja Qui Haung G iha Oekusi
Lorencio Caunan, nu’udar operadór ekonómika husi loja Minizero, agradese tanba daudaun ne’e negosiante Xineza okupa ona sub-rejiaun Pante Makasar, hahú husi suku Costa, Lalisuk, Cunha no tama ona to’o suku Naimeko.
“Se Prezidente hasai sirkulár ba sira, tenke kria kedas ekipa konjunta atu kontrola tutuir, tanba ita observa uluk uitoan de’it maibé agora husi vila-laran ba to’o merkadu Maumate sira tama ona. Entaun ita ne’ebé kapitál ki’ik, ita labele halo buat ida, tanba sira mai ho kapitál bo’ot buat hotu-hotu sira fa’an hotu, ida-ne’e bele hamate ita. Tan ne’e, husu polítika ne’e tenke implementa ona, tanba ami hein kle’ur ona,” nia rekomenda.
Notísia relevante:Autoridade RAEOA indika fatin provizóriu ba AIFAESA,I.P
Jornalista: Abílio Elo Nini
Editór: Rafael Ximenes de A. Belo
