DILI, 15 Jullu 2025 (TATOLI)—Estudante sira husi Eskola Ensinu Báziku Sentrál (EBC, sigla portugés) 30 Agostu Komoro uza ona uniforme eskolár iha ezame períodu daruak.
“Iha EBC 30 Agostu utiliza uniforme eskolár maibé ba de’it estudante 70 ano. Ba 80 no 90 ano uza nafatin farda tuan,” Diretór EBC 30 Agostu, Baltazar Borromeu, informa ba Ajénsia TATOLI, iha ninia knaar fatin, Komoro, Tersa ne’e.
inan-aman husi estudante koordena hodi kontrata empreza indonéziu ida mak suku, ne’ebé kada estudante tau osan $15. Nune’e, estudante kuaze 700 mak sei uza uniforme eskolár ne’e.
“Ita-nia estudante hatama $15 tanba farda oin ida (mutin-xokolate) de’it no kompleta ho imblema ho dasi sira. Ba kaos ne’e husi parte eskola mak aranja fali,” nia akresenta.
Eskola EBC 30 Agostu Komoro iha estudante hamutuk 1.851, kompostu husi feto 912 no mane iha 939, ho nia manorin iha 63, Ensinu Báziku Filiál (EBF) 05 Komoro iha estudante 2.208, kompostu husi feto 1.080 no mane 1.128 ho nia manorin 56. EBF 12 Outubru iha estudante hamutuk 2079, kompostu husi feto iha 1017 no mane 1062, ho nia manorin iha 44. EBF 06 Marinir iha 466, kompostu husi feto iha 230 no mane 236, ho nia manorin iha 22, ne’ebé totál estudante hamutuk 6.604, kompostu husi feto iha 3.239 no mane iha 3365, ho totál manorin 185.
Notísia relevante : ME lansa uniforme eskolár nasionál, PM prefere haree didi’ak
Diretór Eskola EBC 10 Dezembru, Calistro Guteres, garante katak ezame terseiru períodu estudante hotu bele utiliza ona uniforme tanba iha ona prosesu nia laran.
“Uniforme eskolár ba Eskola 10 Dezembru agora iha hela prosesu nia laran. Tanba ne’e ami espera katak ezame terseiru períodu ne’ebé sei mai iha fulan-Novembru, estudante hotu-hotu bele uza ona uniforme eskolr,” nia katak.
Parte eskola realiza sorumutu iha loron 03 Maiu, ho inan-aman no Inspetór Edukasaun munisípiu Dili, deside katak fó ba eskola mak kontrata empreza no inan-aman kontribui de’it osan liuhusi Concelho Pais dos Estudantes.
“Tanba ne’e, Concelho Pais dos Estudantes mak simu sira-nia osan, no Concelho Pais dos Estudantes mak responsabiliza ba farda, depois farda tama, halo distribuisaun ba estudante sira,” nia tenik.
Kada estudante hatama osan $50, kompostu husi farda unidade tolu inklui meias rua, tanba bazeia ba uniformidade husi edukasaun nia orientasaun.
“Farda unidade ida $19, tanba ne’e farda tolu hamutuk $48 dollar inklui ho meias $2, ida-ne’e mak totál hamutuk $50, ne’e tuir inan-aman nia proposta iha enkontru ne’ebé inklui ho akta,” nia akresenta.
Uniforme referidu ba de’it 70 no 80 ano, enkuantu ba 90 ano laiha tanba sira hela fulan-haat sira tama ona ba ezame nasionál.
“Sira nafatin uza farda tuan, bainhira tama Outubru sira ezame hotu sira la uza ona,” Diretór Eskola hato’o.
Jornalista : Osória Marques
Editora : Julia Chatarina
