DILI, 15 Jullu 2025 (TATOLI)–Prezidente Federasaun Atletizmu Timor-Leste (FATL), Afrânio Xavier Amaral, konfirma katak daudaun ne’e modalidade Atletizmu másimu ona hein atu enfrenta iha jogu desportivu Komunidade Nasaun Sira Ko’alia Lian Portugés (CPLP, sigla portugés) ne’ebé sei realiza iha semana ne’e iha Dili.
Notísia Relevante: Afrânio: “Ita hamutuk apoia atleta timoroan sira iha jogu desportivu CPLP”
“Ita hahú preparasaun iha kedan fulan-janeiru to’o mai ohin loron, ita halo preparasaun balun iha Dili no balun iha Glenu-Ermera. Ita-nia ekipa hamutuk atleta mane neen (6) no feto atleta neen (6), entaun ita-nia atleta hamutuk na’in-12 mak kompete iha eventu ne’e,” Afrânio hateten ba agência Tatoli iha Faról bainhira partisipa iha programa “Entrevista Eskluziva” ho tópiku, “Preparativu ikus ba modalidade Atletizmu-Karate-do ba jogu CPLP”, iha estúdiu Faról, tersa ne’e.
Nia dehan, atleta sira sei kompete ho kategoria ka númeru halai metru 100, metro 200, saltu komprimentu, lansamentu peju, hala’i metru 1,500 no metru 3,000 ba feto ho mane.
“Ita halo preparasaun ho durasaun ne’ebé naruk uitoan, sira-nia faze tama ona ba pra-kompetisaun, entaun ita-nia atleta nia kondisaun iha 95% di’ak no hein ba kompete,” nia dehan.
Nia hatutan, atleta ne’ebé durante konsentra iha Glenu daudaun ne’e tau hamutuk ona ho atleta sira-ne’ebé durante ne’e halo preparasaun iha Dili.
“Sira hotu agora konsentra iha Ótel Ramelau, sira-nia hahan di’ak tebes tanba kontrola direta husi médiku sira-ne’ebé espesifiku kona-ba ai-han nian,” nia dehan.
Tuir kalendáriu ne’ebé fó sai ona, modalidade atletizmu husi nasaun hitu (7) sei kompete hahú loron 21-23 Jullu 2025 semana oin no atividade sei hahú lorokraik.
Nasaun ne’ebé konfirmadu ho sira-nia atleta hodi kompete iha modalidade atletizmu mak hanesan Portugál, Guiné-Bissau, Mosambike, São Tome e Prinsipe, Cabo Verde, Angola no Timor-Leste, enkuantu nasaun rua seluk hanesan Brazíl no Guine Equatoriál la partisipa iha jogu referidu.
Tuir oráriu ne’ebé iha, jogu desportivu CPLP ne’e sei halo abertura iha sábadu (19 Jullu) no sei ensera iha Sábadu (26 Jullu) tinan ne’e.
Jornalista : Hortencio Sanchez
Editór : Cancio Ximenes
