DILI, 15 Jullu 2025 (TATOLI)–Prezidente Fedarasun Atletizmu Timor-Leste (FATL), Afrânio Xavier Amaral, husu ba komunidade atu fó apoia másimu ba atleta timoroan sira-ne’ebé sei kompete iha jogu Komunidade Sira Ko’alia Lian Portugés (CPLP, sigla portugés) ne’ebé sei akontese iha loron 19-26 fulan-Jullu tinan 2025 ne’e.
Notísia Relevante: Komunidade sei asesu gratuitamente jogu desportivu CPLP
“Husu ba komunidade, ida-ne’e foin primeiru ita nia Governu simu kna’ar ida-ne’e liuliu Ministériu Juventude, Desportu, Arte no Kultura (MJDAK), entaun mai ita hotu hamutuk ho espiritu desportivu fó susesu ba eventu ne’e,” Afrânio hateten ba Tatoli liuhusi programa “Entrevista Eskluziva” ne’ebé ho tópiku “Preparativu modalidade Atletizmu-Karate-do ba jogu CPLP” ne’ebé realiza iha estúdiu Faról, tersa ne’e.
Nia husu ba públiku ne’ebé hakarak akompaña atleta husi atletizmu sira-nia kompetisaun hahú iha segunda (21 Jullu) no termina iha kuarta (23 Jullu) semana oin mai.
“Ba maluk sira-ne’ebé hakarak akompaña ita-nia atleta sira halai, bele ba iha Estádiu Munisipál Dili. Ita tenke fó apoia ba sira, atu sira iha mentalidade ne’ebé di’ak hodi kompete,” nia dehan.
Tanba ne’e, nia husu ba ema hotu atu koopera ho Governu hodi fó susesu ba jogu desportivu CPLP atu nune’e bele hamorin Timor-Leste nia naran.
Notísia Relevante: Abertura jogu desportivu CPLP sei hala’o iha 19 Jullu
“Ita tenke fó susesu ba eventu ne’e. Ida-ne’e parte ida hatudu ita-nia kultura respeitu no hadomi, nune’e ita-nia maluk nasaun seluk sira fila, lori ita-nia istória ne’ebé di’ak,” nia afirma.
Nasaun ne’ebé konfirmadu ho sira-nia atleta hodi kompete iha modalidade atletizmu mak hanesan, Portugal, Guíné-Bissau, Mosambike, São Tome e Prinsipe, Cabo Verde, Angola no Timor-Leste, enkuantu nasaun rua seluk hanesan Brazíl no Guine Equatoriál la partisipa iha jogu referidu.
Tuir orariu ne’ebé iha, jogu desportivu CPLP ne’e sei halo abertura iha sábau (19 Jullu) no sei ensera iha sábadu (26 Jullu) 2025 ne’e.
Preparasain ba atleta sira-ne’e hahú kedas iha Dili no Glenu-Eremera Janeiru to’o mai ohin loron, ho ekipa ekipa hamutuk mane neen (6) no feto neen (6) entaun Timor-Leste nia atleta hamutuk na’in-12 mak kompete iha jogu depostivu CPLP ne’e.
Atleta sira-ne’e sei kompete ho kategoria ka númeru halai metru 100, metro 200, saltu komprimentu, lansamentu peju, hala’i metru 1,500 no metru 3,000 ba feton ho mane.
Notísia Relevante: FATL prepara atleta na’in-12 partisipa iha jogu CPLP
Jornalista : Hortencio Sanchez
Editór : Cancio Ximenes
