DILI, 17 Jullu 2025 (TATOLI) – Governu atualiza, ohin, ba Parlamentu Nasionál (PN) prosesu atu halo auditoria esterna ba Kámara Konta.
Vise-Ministru ba Asuntu Parlamentár, Adérito Hugo da Costa, lembra katak Parlamentu iha tinan kotuk aprova ona rezolusaun ida hodi husu atu halo auditoria ne’e. Ba deliberasaun ne’e Governu simu hodi identika ona orsamentu hodi bele realiza auditoria, maibé jestór Tribunál Rekursu (TR) nian momentu ne’ebá la fó andamentu atu implementa rezolusaun referida.
“Tanba ne’e, jestór foun Tribunál Rekursu lideradu husi Afonso Carmona, fó ona andamentu ba rezolusaun Parlamentu, hodi envia karta ba Governu atu buka firma internasionál indepedente sira atu halo auditoria esterna”, vise-ministru dehan.
Daudaun, Ministériu Finansa halo hela koordenasaun ho parte TR ba kestaun referida, nune’e sei haree auditoria ne’e hahú husi tinan finanseiru ida ne’ebé, tanba ne’e presiza kustu.
Rekorde katak, iha 19 Marsu 2024, Parlamentu aprova rezolusaun númeru 34/VI(1a) hodi rekomenda Governu atu halo auditória independente ba jestaun Kámara Konta.
Tuir proposta testu rezolusaun ne’ebé iha katak, tuir forsa aplikasaun iha artigu 25 alínea b husi lei númeru 9/2011, 17 Agostu, ne’ebé aprova orgánika Kámara Konta, fiskalizasaun jestaun Kámara Konta Tribunál Superiór Administrativu, Fiskál no Konta, hodi hala’o anuál, realiza husi empreza espesializada ba auditória no konsta relatóriu atividade Kámara Konta, no auditória husi empreza espesializada ne’e hili liuhusi konkursu.
Tuir konstituisaun artigu 92 no artigu 25 alínea b, númeru 9/2011, 17 Agostu, deputadu ne’ebé asina sai proponente ba rezolusaun ne’e kompostu husi deputadu Duarte Nunes, Patrocíno dos Reis Fernandes (CNRT), Aniceto Guterres (FRETILIN), Luís Roberto da Silva (KHUNTO), Maria Angelina Sarmento (PLP), Armando dos Santos (PD). Sira propoin ba Parlamentu Nasionál hodi rekomenda ba Governu ho pontu tolu, hanesan determina realizasaun auditória finanseira ba Tribunál Rekursu, husi entidade independente ne’ebé dezigna liuhusi proposta Kámara Konta husi periódu 2018-2023.
Daruak, auditória finanseira atu hala’o prosede análize konta, situasaun finanseira no legalidade no regularidade ba operasaun ne’ebé realiza husi Kámara Konta no emite korrespondente pareser.
Ikus mak iha termu konkursu presiza mensiona devér informa periódikamente ba PN ba andamentu auditória no konkluzaun interlokutória.
Notísia relevante: PN aprova rezolusaun husu auditória indepedente ba Kámara Konta
Jornalista: Nelson de Sousa
Editora: Maria Auxiliadora
