SINGAPURA, 15 Jullu 2025 (TATOLI)–Governu Timor-Leste oferese ai-kameli oan hamutuk 60 nu’udar prezente ba komemorasaun loron independénsia Singapura ba dala-60.
Serimónia entrega ne’e husi Primeiru-Ministru (PM), Kay Rala Xanana Gusmão ba Primeiru-Ministru Singapura, Lawrence Wong, durante almosu iha salaun Otél Pan Pacific, iha domingu (14/07), ne’ebé ai-oan sira kuda iha Gardens by the Bay, iha segunda (15/07).
Molok entrega, Embaixadór Timor-Leste iha Singapura, Alexandre Tilman, introdús ba Primeiru-Ministru Singapura, Lawrence Wong, katak ai-kameli hirak ne’e hanesan prezente ba Singapura ne’ebé komemora tinan 60 independénsia.
Bazeia ba nota ne’ebé Ajénsia TATOLI asesu husi Gabinete Primeiru-Ministru, iha okaziaun ne’e, Primeiru-Ministru Lawrence Wong agradese ba ninia omólogu tanba konsidera prezente ai-kameli oan ne’e úniku tanba nu’udar símbolu forte ida kona-ba oinsá nasaun rua bele buras hamutuk iha tinan sira tuir mai, iha kooperasaun bilaterál no iha organizasaun rejionál hanesan Asosiasaun Nasaun Sudeste Aziátiku (ASEAN, sigla inglés).
“Ha’u garante katrak Singapura sei tau-matan didi’ak ba ai-oan sira no asegura katak sira sai ai-hun ne’ebé forte no metin, ne’ebé apropriadu ba amizade ne’ebé dura entre ita-nia nasaun rua,” nia hato’o.
Aleinde ne’e, Singapura sei kontinua serbisu hamutuk ho Timor-Leste, hametin parseria no lori to’o buat ne’ebé boot liután.
Notísia relevante : Singapura apoiu adezaun Timor-Leste ba ASEAN
Lawrence Wong lori Governu no povu Singapura nia naran dezeja saúde di’ak no susesu ba Estadu ho Governu Repúblika Demokrátika Timor-Leste, ba Prezidente Repúblika, José Ramos Horta no Primeiru-Ministru Xanana Gusmão nia saúde di’ak, ba dame no prosperiedade no ba amizade ne’ebé dura entre nasaun rua.
Iha oportunidade ne’e, Primeiru-Ministru, Kay Rala Xanana Gusmão, parabeniza Estadu no Povu Singapura, ne’ebé komemora aniversáriu independénsia ba dala-60 iha tinan ida-ne’e.
“Ha’u hato’o parabéns ba Prezidente Repúblika Singapura, Tharman Shanmugaratnam, Primeiru-Ministru, LawrenceWong no Povu Singapura tomak. Parabéns ba tinan 60 nasionalidade ne’ebé notável. Agradese ba amizade ne’ebé dura entre Timor-Leste no Singapura,” PM Xanana parabeniza.
PM Xanana Gusmão kuda ai-kameli oan 60 iha Gardens by the Bay, ne’ebé hanesan paizajen urbana ida iha rai ektare 110 iha distritu Marina Bay, iha Rejiaun Sentrál Singapura nian, ne’ebé lokaliza iha Rezervatóriu Marina.
Iha Fatin prinsipál tolu maka Bay South Garden (iha Marina South), Bay East Garden (iha Marina East) no Bay Central Garden (iha Downtown Core no Kallang). Foin lalais ne’e dezenvolve husi Bay South Garden iha ektare 54 no jere hosi Grant Associates.
Serimónia entrega ai-kameli oan 60 ne’e, akompaña husi Vise Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Vise-Ministra ba Asuntu ASEAN, Milena Maria da Costa Rangel, Sekretáriu Estadu Komunikasaun Sosiál, Expedito Dias Ximenes, Embaixadór Timor-Leste iha Singapura, Alexandre Tilman no Xefe Gabinete Primeiru-Ministru, Elizabeth Exposto.
Primeiru-Ministru Singapura, Lawrence Wong akompaña husi Ministru Relasaun Esteriór Singapura, Vivian Balakrishnan.
TATOLI
