DILI, 18 Jullu 2025 (TATOLI) – Nasaun membru Komunidade País Ko’alia Lian Portugés (CPLP, sigla portugés) ne’ebé konfirmadu atu kompete iha modalidade Karaté-do mak hanesan Portugál, Mosambike, Saun Tome no Prínsipe, Kabu Verde, Angola no Timor-Leste.
Husi nasaun sira ne’e, iha totál atleta hamutuk na’in-20 mak sei hasoru malu iha Jogu Desportivu CPLP ba Edisaun da-XII.
“Ami simu ona lista husi nasaun hotu. Kuaze país barak haruka nia ema la tuir buat ne’ebé iha. Totál atleta iha ema na’in-20 de’it”, Sekretáriu-Jerál Federasaun Karaté-do Timor-Leste (FKTL), António Carlos de Araújo, hateten ba Tatoli iha Jináziu Dili (GMT, sigla indonéziu), ohin.
António de Araújo esplika katak jogu ne’e fahe ba kategoria haat ne’ebé diferente. Atleta balun sei kompete iha klase menus husi kilógrama (kg) 48, seluk iha 53 kg, 55 kg to’o 60 kg.
Tuir oráriu, atleta Karaté-do husi nasaun CPLP mantein treinu husi loron 18 to’o 20 Jullu iha Jináziu Dili, bazeia ba idaidak nia oráriu.
Nune’e, iha loron 23 Jullu, sei iha enkontru tékniku no tetu atleta sira-nia todan, depois mak fó sai atleta husi nasaun ida ne’ebé sei hasoru país ida ne’ebé, tuir idaidak nia grau. Bazeia ba kalendáriu, kompetisaun sei hala’o husi loron 24 to’o 25 Jullu 2025.
Atleta Karaté-do husi Timor-Leste mantein treinu hodi prepara tátika
António Carlos de Araújo mós informa katak Timor-Leste rasik iha atleta na’in-haat, kompostu husi feto rua no mane rua ne’ebé sei kompete iha eventu referidu. Daudaun atleta sira ne’e kontinua halo preparasaun tátika no estratéjia antes tun ba batalla.
“Ohin, kontinua halo preparasaun husi sira-nia treinadór sira, oinsá haree tékniku no tátiku. Tékniku liga liu ba sees, tuku, tebe. Ida-ne’e mak naturalmente hanesan Karaté ninia jogu”, nia hateten.
Atleta timoroan sira-nia preparasaun hahú iha Janeiru to’o ohin loron, nune’e iha ona preparasaun másima atu tuir kompetisaun. “Kona-ba alimentasaun ba atleta sira di’ak, tanba hetan kontrolu husi médiku sira ne’ebé toma konta ba ai-han”, nia realsa.
Notísia relevante: Alteta Karate-do husi Portugál intensifika preparasaun iha Dili antes Jogu CPLP
Jornalista: Nelson de Sousa
Editora: Maria Auxiliadora
