Alteta Karaté-do husi Portugál intensifika preparasaun iha Dili antes Jogu CPLP
DILI, 18 Jullu 2025 (TATOLI) – Delegasaun atleta modalidade Karaté-do husi Portugál kontinua foka ba preparasaun fízika no tátika antes kompete iha Jogu Desportivu Komunidade Nasaun Ko’alia Lian Portugés (CPLP, siglá portugés) edisaun da-XII, ne’ebé sei hala’o iha Dili.
Diretór Federasaun Karaté husi Portugál, José António Chagas Mendes, informa katak ekipa portugeza ne’e kompostu husi atleta na’in-haat – feto ruan no mane rua, ne’ebé sei reprezenta nasaun iha eventu ne’e.
Delegasaun ne’e to’o Timor-Leste iha loron 17 Jullu, no dezde ne’e mantein treinu, ho foku ba preparasaun fízika no no estratejia téknika, ho objetivu atu alkansa rezultadu di’ak iha eventu ne’e.
“Ohin dadeer ekipa realiza treinu, hafoin hala’o viajen ne’ebé dook”, nia hateten ba Tatoli, durante halo akompañamentu iha sesaun treinu iha Jináziu Dili.
Tuir diretór ne’e, atleta sira preparadu atu kompete iha eventu ne’e, tanba sira rasik iha dezempeñu di’ak iha kompetisaun internasionál, sira prontu atu hasoru eventu ne’e. “Ami iha esperansa boot, sei lori mós rezultadu [di’ak]”, nia otimista.
Mendes destaka mós importánsia husi eventu ne’e ba nasaun membru CPLP sira no subliña katak jogu ne’e hametin lasu amizade no kooperasaun entre nasaun partisipante sira.
Tuir kalendáriu ofisiál, serimónia abertura Jogu Desportivu CPLP sei realiza iha loron 19 Jullu no enserramentu sei hala’o iha loron 26 fulan hanesan.
Notísia relevante: Atleta Karate-do husi Portugál preparadu kompete iha jogu desportivu CPLP
Jornalista: Nelson de Sousa
Editora: Maria Auxiliadora
