DILI, 23 Jullu 2025 (TATOLI) – Rejime foun aprovizionamentu ne’ebé Governu introdús sei redús prosesu burokrasia hodi bele aselera implementasaun projetu infraestrutura sira ba povu.
Prezidente Komisaun E iha Parlamentu Nasionál ba Asuntu Infraestrutura, Marcos Xavier, apoia desizaun Ezekutivu nian hodi altera dekretu-lei kona-ba Kódigu Aprovizionamentu no Kontratu Públika foun, hodi estende implementasaun ne’ebé sei tama vigór iha loron 01 Janeiru 2026.
“Ami durante ne’e deteta katak ita-nia aprovizionamentu ne’e dalaruma lentu uitoan, tanba ita-nia lei [vijente] mak halo hanesan ne’e. Maibé ho mudansa kódigu aprovizionamentu, hanoin tinan oin, ita bele aselera dezenvolvimentu di’ak liután no lais, la demora”, nia espera.
Nia nota katak durante ne’e prosesu balun lori tempu naruk mezmu serbisu ne’ebé atu halo fulan ida nian, maibé tenke to’o fulan tolu ka liu. “Ita hanoin ho rejime foun, halais liután prosesu, fó kompeténsia ba ministériu sira atu haree didi’ak obra, garante transparénsia no kualidade obra”, realsa.
Notísia relevante: MF esklarese razaun estende implementasaun rejime foun aprovizionamentu
Antes ne’e, Ministra Finansa, Santina Cardoso, esklarese razaun Governu altera Dekretu-Lei númeru 1/2025 08 Janeiru kona-ba Kódigu Aprovizionamentu no Kontratu Públika foun, hodi estende loron implementasaun tanba presiza konfigura lei iha sistema finanseiru, nune’e bele grava prosesu aprovizionamentu sira hotu bainhira implementa.
Rekorde katak deputadu balun levanta kona-ba ezekusaun Orsamentu Jerál Estadu (OJE) 2025 iha kategoria kapitál dezenvolvimentu katak tama ona ba trimestre datoluk kontinua ki’ik, tanba demora iha aprovizionamentu.
Notísia relevante: Komisaun E deteta ezekusaun FI ki’ik tanba prosesu aprovizionamentu la’o kleur
Jornalista: Nelson de Sousa
Editora: Maria Auxiliadora
