DILI, 25 Jullu 2025 (TATOLI)-Atleta portugés Luís António Morais sai primeiru lugar iha modalidade Karate-do maskulinu, iha kategória kilógrama (kg) -60 no angolanu Jesus Milambo António Muanza iha kategoria -55kg.
Luís halakon nia adversáriu timoroan, Eugénio da C. Wondeng Soares, iha finál Jogu Desportu Komunidade Nasaun Lian Portugés (CPLP-sigla portugeza) Edisaun da-XII 2025, ne’ebé hala’o iha Dili.
Iha kategoria -55kg ne’e, angolanu Jesus Milambo António Muanza hamonu mós atleta timoroan Alexandre Leonel de J. Nessi ho pontu (3-2).
Iha inísiu jogu entre atleta portugés Luís António no Eugénio Soares, sira lansa kedan tebe no tuku ho velosidade maka’as ba malu, ne’ebé kona uluk atleta timoroan no hamonu nia hodi marka kedan pontu lima (5-0).
Iha momentu ne’e kedan adeptu husi Portugál hakilar “Portugál, Portugál, Portugál”, maski nune’e la hamate atleta nasionál ne’e nia mentalidade hodi kontinua jogu no konsege muda pontu ba (2-5) iha minutu 1:05.
Husi ne’e, adeptu Timor-Leste mós halo barullu, maibé Luís António hatudu nia jogu no halo pontu semo dook liu ba (12-2), no tempu mós ramata. Nune’e atleta portugés ne’e iha direitu tomak manán ho pontu 12-2. “Sente kontente ho vitória ne’e”, Luís espresa ba Tatoli iha Jináziu Dili, ohin.
Sorin seluk, timoraan Eugénio Soares, admite katak nia iha difikuldade durante jogu tanba kolen depoizde kompetisaun horisehik. Aleinde ne’e, rekoñese katak durante ne’e treinu la másimu, maibé ne’e sai esperiénsia atu prepara an di’ak liután iha eventu internasionál iha futuru.
Notísia relevante: Eugénio Soares halakon nasaun tolu no hakat bá finál Karaté-do 60kg
Iha kategoria -60kg ne’e, klasifikasaun daruak monu ba Timor-Leste no datoluk ba atleta Patrício Nkruma Samba Neto (Angola) no Morgan Monteiro de Ceita da G. do Espírito Santo (Saun Tomé no Prínsipe).
Iha kategoria -55kg, atleta timoroan hetan segundu lugar no Kevin Miguel Ferreira de Sousa Silva (Mosambike) no Afonso Alexandre de Bessa Ferreira (Portugál) mak sai terseiru lugar.
Notísia relevante: Timor-Leste no Angola sei hadau medalla osan-mean iha Karaté-do 55kg
Jornalista: Nelson de Sousa
Editora: Maria Auxiliadora
