DILI, 26 Jullu 2025 (TATOLI) – Jogu Komunidade País Ko’alia Lian Portugés (CPLP, sigla portugés) ba Edisaun da-XII iha 2025 ne’ebé hala’o iha Timor-Leste enserra ona iha sábadu ne’e, iha Estádiu Munisipál Dili.
Iha serimónia ne’e, Primeiru-Ministru, Xanana Gusmão, destaka espíritu uniaun, amizade, no aprendizajen ne’ebé marka iha eventu ne’e.
Ho Governu no povu Timor-Leste nia naran, Xanana agradese delegasaun sira hotu ne’ebé partisipa iha Jogu CPLP no subliña orgullu tanba ba dahuluk país realiza jogu ne’e. “Durante semana ikus ne’e, Dili la’ós de’it kapitál Timor-Leste nian. Maibé kapitál desportu, juventude no amizade entre povu sira CPLP nian”, nia deklara iha serimónia enserramentu ne’e iha Estádiu Dili.
Xefe Governu destaka mós impaktu pozitivu husi kompetisaun, liuliu entre joven sira. “Desportu mak eskola ida ba pás no toleránsia nian, espasu ida iha ne’ebé ema hotu hetan fatin no fonte ida ba inspirasaun, espesialmente ba jerasaun joven liu”.
Ho lema “Unidu Ita Ida De’it”, eventu ne’e reúne atleta, treinadór no reprezentante husi Angola, Kabuverde, Mosambike, Portugál, Saun Tomé no Prínsipe no Timor-Leste. Aleinde kompetisaun, semana ikus ne’e marka ho interkámbiu kulturál, kooperasaun internasionál no fórum juventude no desportu.
Durante serimónia eserramentu, Xanana reforsa katak desportu aleinde kompetisaun, hanesan elementu esensiál ba promosaun valór sira hanesan respeitu, étika no traballu ekipa. “Joven atleta sira hatudu sira-nia espíritu desportivu no amigavel. Hatudu mai ita empeñu no traballu ekipa iha pról objetivu komún, hanorin mai ita valór respeitu fundamentál husi ekipa no husi sira ne’ebé kompete no étika desportiva nian”.
Nia mensiona mós iha semana ne’e, Timor-Leste akolle mós Fórum Juventude CPLP no Reuniaun Diretór-Jerál sira Juventude no Desportu CPLP nian, ne’ebé proporsiona “valiozu oportunidade diskusaun no kooperasaun entre ita-nia Estadu-membru sira”.
Xanana aproveita momentu ne’e hodi hato’o nia apresiasaun ba esforsu no dedikasaun husi ema hotu ne’ebé servisu no kolabora iha organizasaun Jogu CPLP nian, inklui voluntáriu sira, ekipa téknika no lojístika, profisionál saúde, seguransa, no komunikasaun nian, no parseiru institusionál sira.
“Ikus liu, ha’u hakarak dirije liafuan balun ba joven atleta sira. Foinsa’e sira, imi maka prezente no futuru. Ha’u hein katak imi kontinua demonstra iha imi-nia moris no promove iha imi-nia atividade desportiva espíritu unidade no solidariedade ne’ebé imi hatudu iha ne’e. Ita-boot sira maka guarda ba valór sira ne’ebé sustenta umanidade. Ami despede ita-boot sira ho fuan nakonu no saudades. Ha’u hein katak ita-boot sira-nia viajen la’o di’ak to’o uma”, nia hato’o.
Xanan dehan Timor-Leste prontu nafatin atu simu sira iha bainhira de’it sira hakarak mai vizita país. “Ha’u dezeja ba ita-boot sira hotu, no edisaun tuirmai Jogu CPLP nian iha tinan 2027 iha Brazíl, susesu hotu. Unidu, Ita Ida De’it” konklui.
Jornalista: Arminda Fonseca
Editora: Maria Auxiliadora
