MANUFAHI, 26 Jullu 2025 (TATOLI)—Governu liuhusi Ministériu Obra Públika (MOP) no Bee Timor-Leste, Empreza Públika (BTL, E.P) inaugura kanalizasaun fornesimentu bee-moos iha postu administrativu Fatuberliu, munisípiu Manufahi, ne’ebé fó asesu ba uma-kain 769.
Ministru Obra Públika, Samuel Marçal, hateten, atividade ohin halo inaugurasaun ba fornesimentu bee-moos inklui observa direta komunidade nia problema kona-ba nesesidade bázika, tanba ne’e husu ba komunidade atu kuidadu ho fasilisade ne’e.
“Primeiru-Ministru orienta ona mai ha’u atu tau prioridade liu ba ita-nia komunidade ne’ebé iha área rurál no iha suku, aldeia tantu postu sira,” Ministru informa ba jornalista sira iha edifísiu Administrasaun postu Fatuberliu, ohin.
Governante konta tuir, MOP halo serbisu barak liu iha área rurál, liuliu iha eletrisidade, estrada no bee-moos, durante tinan-rua nia-laran.
“Serbisu tolu ne’e relasaun metin liu ho ita-nia povu nia nesesidade no preokupasaun loro-loron, nune’e ita sempre la’o halo fiskalizasaun barak liu ba aldeia sira hodi rona povu nia preokupasaun,” nia akresenta.
Ministru dehan, komunidade lokál merese duni atu hetan fasilidade ne’e.
Notísia relevante : Abitante Fatuberliu preokupa ho kondisaun estrada
Molok atu halo inagurasaun ba projetu ne’e, Ministru halo vizita bá fatin perfurasaun bee no fatin harii tanke rezervatóriu, nune’e governante ne’e haksolok tebes ho kualidade obra ne’ebé timoroan rasik mak prodús.
“Husu ba komunidade atu kuidadu no utiliza didi’ak kanalizasaun sira ne’ebé mak Governu fornese ona, atu nune’e bele uza to’o tinan naruk nia laran. Aleinde ne’e mós labele uza bee-moos ne’e hodi hakiak ikan no kuda modo,” nia hameno.
Prezidente Bee Timor-Leste, Empreza Públika (BTL, E.P), Gustavo da Cruz, informa, sistema bee ne’ebé ohin inaugura inisia iha tinan 2023 no serbisu fahe ba pakote haat, iha faze perfurasaun bee kaer husi kompañia H2o, ho kapasidade bee litru 18 pur segundu ho medida kúbiku 600.
Faze daruak, lori bee ba iha tanke rezervatóriu harii husi kompañia Harley, faze datoluk kontinua halo kanalizasaun ba distribuisaun bee ne’e husi kompañia HAKSOLOK no faze ikus liu mak liga metru kontadór ba abitante sira-nia hela fatin, ne’ebé toma-konta husi kompañia Zahar.
“Kompañia haat ne’e kaer projetu ne’e ho totál orsamentu hamutuk millaun $1,5 hodi fó benefísiu ba uma-ka’in 759, maibé sei falta área balun ne’ebé mak ita presiza estende iha tempu tuir mai,” Prezidente BTL, E.P relata.
Nia konsidera, investimentu ne’e importante ba povu nia moris no BTL, E.P hanesan instituisaun ne’ebé jere bee husu komunidade atu kuidadu fasilidade atu nune’e fó biban ba Governu hodi tau-matan ba postu sira ne’ebé mak halerik hela ba bee-moos.
Prezidente Autoridade Munisípiu Manufahi, Luís Marçal da Costa Tavares, agradese ba Governu liuhusi MOP no BTL, E.P ne’ebé oferese ona ba komunidade nia moris.
“Ita-boot sira-nia responsabilidade boot ba Autoridade lokál no BTL hodi serbisu hamutuk jere sistema ne’ebé konstrui ona husi kompañia sira. Lori munisípiu Manufahi nia naran, prontu koopera no serbisu hamutuk ho Ministériu Obra Públiku hodi asegura dezenvolvimentu ba rai ida-ne’e,” Autoridade lokál katak.
Nune’e mós, Abitante postu Fatuberliu, Marta Maco, sente kontente tebes ba infraestrutura foun ne’e tamba kuaze tinan barak ona sira la asesu bee-moos ho di’ak.
“Ho nune’e, ami sei kuidadu kanalizasaun ne’e ho di’ak atu nune’e bee-moos ne’e bele fó benefísiu nafatin ba ami-nia nesesidade loro-loron nian,” Marta Maco, hato’o.
Nia dehan, komunidade lokál prontu koopera ho Governu hodi bele aproveita fasilidade ne’e ba atividade seluk ne’ebé produtivu.
Serimónia inagurasaun kanalizasaun fornesimentu bee-moos ne’e partisipa husi MOP no orgaun tutela, Amu Pároku Fatuberliu, Ajénsia Dezenvolvimentu Nasionál (ADN), Autoridade lokál, Autoridade seguransa, kompañia haat responsável ba projetu inklui komunidade lokál.
Jornalista : Alexandra da Costa
Editora : Julia Chatarina
