DILI, 09 Outubru 2025 (TATOLI)—Timor Gás no Petróleu, Empreza Públika (Timor GAP, E.P) no Empreza Finder Energy kuaze tama iha faze estudu Desizaun Investimentu Finál (FID, sigla inglés) ba kampu petrolíferu Kuda Tasi-Jahal.
“Buat hotu la’o di’ak, tinan 2026 nia rohan ita bele tama ona ba faze Dezisaun Investimentu Finál, depoizde faze ida-ne’e ita bele tama ona konstrusaun no dezenvolvimentu no karik iha tinan ida ka rua mai bele halo ona produsaun,” Vise-Prezidente ba Dezenvolvimentu Greater Sunrise husi Timor GAP, E.P, Domingos Lequi Siga Maria hateten iha Sentru Konvensaun Dili (CCD, sigla portugés), Kinta ne’e.
Kuda Tasi-Jahal hanesan kampu petróleu ne’ebé lokaliza besik iha kampu petrolíferu Kitang ne’ebé uluk empreza ENI mak halo produsaun.
“Kampu ne’e iha rezerva ne’ebé konfirmadu maski ladún boot maibé sufisiente bele avansa ba produsaun,” nia akresenta.
Vise-Prezidente dehan, kona-ba garantia atu halo produsaun iha 2027, Timor-Leste iha planu maibé tenke iha esforsu no presiza halo husi aspeitu tékniku, dezeñu, no enjeñaria.
“Tanba husi FID mak ita foin hatene loloos katak fulan hira tan mak ita bele halo produsaun, maibé tuir ita-nia planu tinan 2027 nia rohan ka mais tarde trimestre dahuluk tinan 2028 bele halo ona produsaun, maibé konforme serbisu ne’ebe mak la’o hela,” nia katak.
Notísia relevante : Finder Energy garante sei halo produsaun ba kampu Kuda Tasi-Jahal iha 2026-2027
Aleinde ne’e, parte rua halo hela projetu enjeñaria aseleradu, tanba ne’e hanesan xave prinsipál molok atu tama ba atividade produsaun tenke kompleta uluk estudu.
“Bainhira buat hotu la’o di’ak no tama produsaun, mak tuir rezerva ne’ebé mak iha, kampu petrolíferu ne’e konfirmadu iha rezerva purvolta maizde millaun 20 barril ne’ebé mak iha hodi prodús. Kada barríl petróleu fa’an iha merkadu entre $75 no $80,” nia tenik.
Iha loron 06 Agostu 2025, Empreza internasionál Finder Energy hasoru malu ho Prezidente Repúblika José Ramos-Horta hodi aprezenta sira-nia planu prioridade sira ne’ebé atu investe iha setór petróleu iha tasi Timor-Leste no garante katak sei hala’o produsaun mina iha tinan rua oin mai ba kampu rua Kuda Tasi-Jahal.
“Ami hasoru Prezidente Repúblika ne’e atu ko’alia ami-nia planu oinsá ba oin ami bele halo investimentu lalais iha kampu mina rua hanesan Kuda Tasi-Jahal ne’ebé ita-nia trajetu sei halo produsaun iha tinan rua mai,” CEO Finder Energy, Damon Neaves hateten ba Jornalista sira hafoin termina enkontru ho Xefe Estadu.
Jornalista : Arminda Fonseca
Editora : Julia Chatarina
