MANUFAHI, 26 Jullu 2025 (TATOLI)—Abitante postu administrativa Fatuberliu, munisípiu Manufahi, preokupa ho kondisaun estrada ne’ebé difikulta abitante sira-nia movimentu bá-mai.
Abitante Fatuberliu, Marta Maco, hateten, kondisaun estrada hahú kedas husi Betanu to’o Fatuberliu ne’e grave tamba seidauk iha kompañia mak mai normaliza.
“Estrada sai kestaun problemátika mai ami komunidade hodi halo movimentu bá-mai, satán ponte Tutuluru nian ne’ebé mak seidauk finaliza to’o agora, entaun tempu udan ami labele halo movimentu bá Same Vila, ami tenke liuhusi Natarbora,” Abitante informa ba jornalista sira, iha edifísiu Administrasaun postu Fatuberliu, ohin.
Abitante ne’e relata, durante ne’e komunidade rasik mak nahe rai ba estrada kuak sira para ema bele halo movimentu di’ak, tamba ho tempu bailoro bele hamosu rai-rahun maka’as no bele fó impaktu ladi’ak ba ema-nia saúde.
Notísia relevante : Estrada ligasaun Fahinehan-Bubususu grave, afeta ba sentru votasaun ualu
Iha sorin seluk, Administradór postu Fatuberliu, Marcelo Amaral, admite katak komunidade hasoru difikuldade bainhira halo movimentu iha estrada ho kondisaun ladi’ak.
“Ami hein de’it desizaun husi Governu hodi normaliza estrada, tamba estrada mós sai fatór importante ba komunidade, liuliu ponte sira ne’ebé seidauk hadi’a ho másimu, udan mai komunidade labele la’o,” Administradór katak.
Nune’e mós, Prezidente Autoridade Munisípiu Manufahi, Luís Marçal da Costa Tavares, hato’o katak, nia parte komunika ona ba Ministru Obras Públika, Samuel Marçal, hodi tau prioridade ba reabilitasaun estrada iha Fatuberliu.
“Buat hotu presiza ninia prosesu, la’ós tinan ida-ne’e dalaruma mós sei tinan oin mai fali, maibé ita mós nafatin husu ba parte IGEADI atubele halo atendimentu emerjénsia hanesan normaliza estrada balun ne’ebé mak ho kondisaun ladi’ak,” Autoridade munisipál tenik.
Tuir observasaun jornalista nian iha terrenu, nota katak kondisaun estrada ladi’ak hahú husi Betanu to’o Fatuberliu, estrada balun kuak, balun nakonu ho fatuk, no kompañia seidauk normaliza ponte maski ekipamentu pezadu destaka ona iha terrenu.
Jornalista : Alexandra da Costa
Editora : Julia Chatarina
