OEKUSI, 29 Jullu 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, akompaña husi Diresaun Rejionál Infraestrutura (DRI), segunda ne’e, hala’o fiskalizasaun ba projetu reabilitasaun estrada rurál kilometru-23 husi Oénunu suku Suni-Ufe to’o Citrana suku Bene-Ufe sub-rejiaun Nítibe hahú aterru.
Iha biban, ne’e nia rekomenda ba empreza konstrutora sira hanesan, Colneno Unipesoál Lda, Lifau Indah no Raynaldos Unipesoál Lda, atu aselera projetu referidu, nune’e molok udan monu rai, komunidade sira bele asesu ona.
“Oras ne’e kompañia sira hahú serbisu, agora hahú aterru no halo luan estrada, depois tuirmai sei aterru sai di’akliu tan. Ha’u sente iha fulan tolu nia laran, empreza tolu ne’e, sei esforsa atu finaliza, tanba tuir diretór kompañia informa mai, katak to’o fulan-Outubru, obra sira-ne’e tenkie remata ona tanba molok atu tama tempu udan, ema hotu tenke asesu ona,” nia dehan iha Citrana suku Bene-Ufe.
Nu’udar Autoridade RAEOA, enkoraja komunidade sira atu koopera, no empreza sira mós presiza garante kualidade obra.
“Oportunidade hanesan kompañia kaer obra ida, tenke manán, maibé la’ós manán de’it, iha responsabilidade no oportunidade ne’e hamutuk, tanba sei serbisu di’ak, garante kualidade nune’e iha futuru bele kaer obra balun iha rai-bo’ot, entaun obra ne’ebé sira sei halo tenke aprezenta iha finalidade ho kualidade, tanbe ne’e osan Estadu atu hadi’a povu nia moris, ita lakohi halo iha fulan ne’e, fulan oin aat fali ona, ida ne’e labele akontese,” nia rekomenda.
Notísia relevante:KAFI Oekusi aprova empreza tolu reabilita estrada kilometru 23 liu
Jestór sub-rejiaun Nítibe Agustinho Afulit, reprezenta komunidade sira orgullu, tanba iha 2025 ne’e, Governu aterru ona estrada sira iha sub-rejiaun Nítibe kobre suku lima no aldeia 17.
“Ha’u sub-rejiaun Nítibe, tinan ne’e ami sente kontente, tanba Nítibe parte foho husi Usitaku Lela-Ufe to’o Lamasin foho, estrada sira maioria ateru ona, falta de’it tasi-ibun husi Oénunu mai to’o Citrana, maibé agora iha empreza tolu hahú aterru ona, ne’ebé ami laiha impedimentu, ami tenke koopera tanba iha futuru ami mak sei uza estrada ne’e,” nia orgullu.
Diretór empreza Colneno Unipesoál Lda, Marcos Colo, informa, hafoin simu orden serbisu, kompañia hahú aterru ona, maibé nia espera Autoridade RAEOA bele prosesa ona selebrasaun kontratu, nune’e serbisu ho garantidu.
“Ami foin simu orden traballu, maibé ami-nia serbisu la’o ona, hanesan ha’u-nian, progresu serbisu ne’e atinje ona 41%, maibé kontratu ami seidauk asina. Tan ne’e, ami espera Autoridade no DRI no ADN sei bele prepara ona kontratu atu ami bele hahú serbisu ho garantidu,” nia dehan.
Notísia relevante:PM Xanana husu Autoridade RAEOA reabilita estrada rurál sira tenke ho kualidade
Entretantu, empreza tolu neʼebé ezekuta projetu reabilitasaun kilometru-23 mak Lifau Indah Unipesoal Lda sei ezekuta kilometru-ualu, hahú husi Oénunu suku Suni-Ufe to’o aldeia Bona suku Usitaku, kontinua husi empreza Raynaldos Unipesoal Lda sei ezekuta mós kilometru-ualu, husi aldeia Bona ba to’o Fatuto’o suku Bene-Ufe no empreza Colneno Unipesoál Lda sei ezekuta kilometru-7,5 kontinua husi Fatuto’o ba to’o Bitila Citrana suku Bene-Ufe.
Tuir dadús husi Diresaun Rejiojál Infraestrutura, iha tinan ne’e ba Konsellu Administrasaun Fundu Infraestrutura (KAFI) aprova ona proposta husi kompañia 145, daudaun ne’e simu ona ordén serbisu iha terrenu, kona-ba selebrasaun kontratu sei hein verifikasaun tanba proposta neʼebé submete husi kompañia sei hetan verifikasuan husi Diresaun Rejionál Infraestrutura, hafoin ne’e enkamiña ba iha Ajénsia Dezenvolvimentu Nasionál (ADN) hodi halo tan verifikasaun finál.
Notísia relevante:KAFI Oekusi aprova projetu emerjénsia 26 ho kustu millaun $36-resin
Jornalista: Abílio Elo Nini
Editór: Rafael Ximenes de A. Belo
