Estabelesimentu pagamentu dijitál iha HNGV, BNCT sei instala sistema
DILI, 29 Jullu 2025 (TATOLI)—Diretór Servisu Apoiu Diagnóstiku no Terapéutiku iha HNGV, Vidal de Jesus Lopes, informa kona-ba estabelesimentu pagamentu dijitál iha Hospitál Nasionál Guido Valadares (HNGV) daudaun ne’e sei iha prosesu nia laran, tanba Banku Nasionál Komersiu Timor-Leste sei halo instalasaun sistema.
Notísia Relevante: HNGV-BNCTL asina ona MoU atu estabelese pagamentu dijitál
“Foin lalais ne’e, Hospitál Nasionál Guido Valadares (HNGV) asina ona akordu ho BNCTL hodi estabelese pagamentu liuhusi sistema dijitál, nune’e BNCTL halo hela preparasaun ba fatin hodi kria ona dijitaluzasaun,” Vidal de Jesus Lopes hateten ba jornalista sira, iha nia kna’ar fatin HNGV, Bidau, ohin.
BNCTL no HNGV asina ona akordu iha aniversariu HNGV nian, hodi estabelese sistema atu kualker pagamentu halo de’it iha Hospitál no Hospitál oferese ona nafatin no husi parte BNCTL presiza hadi’a tan buat balun, fatin ne’e rasik tanba sira presiza instala sira-nia sistema entaun prosesu la’o hela.
“Fatin ne’e iha parte sorin ne’ebá iha edifisiu atestadu mediku nian, agora sira halo hela no monta hotu sira-nia Sistema, nune’e kualker pagamentu bele akontese ona,” nia dehan.
Nia dehan, ekipa BNCTL bainhira instala hotu ona sira-nia sistema mak iha semana oin bele loke ona dijitaluzasaun, atu nune’e bainhira pagamentu saida de’it sei liuhusi dijitál tanba BNCTL mak sei kontrola iha ne’ebá.
“Sira prepara hotu ona mak ami ba follow-up fila-fali sira-nia fatin no sasán. Bainhira prontu semana oin hanesan ne’e, sira bele halo ona entaun kualker pagamentu bele akontese no BNCTL mak sei kontrola,” nia hateten.
Jornalista : Felicidade Ximenes
Editór : Cancio Ximenes
