DILI, 27 Juñu 2025 (TATOLI)—Hospital Nacional Guido Valadares (HNGV) asina ona nota entendimentu (MoU-sigla ingleza) ho Banku Nasionál Komérsiu Timor-Leste (BNCTL-sigla portugeza) hodi estabelese pagamentu dijitál iha HNGV nune’e selu saida de’it liuhusi sistema dijitál.
“Ohin ita asina ona ho Banku Nasionál Komérsiu Timor-Leste hodi estabelese banku ida iha HNGV nune’e pagamentu saida de’it tenke liuhusi sistema dijitál,” Diretór Ezekutivu HNGV, Nuno Vital hateten ba jornalista sira iha HNGV, Bidau, sesta ne’e.
Nia dehan, durante tinan naruk sistema dijitál ne’e laiha, pagamentu saida de’it selu liuhusi manuál.
“Tinan naruk ita laiha sistema ida-ne’e, entaun iha tinan ida-ne’e ita implementa nune’e hafásil komunidade ne’ebé tuir teste, ezemplu, teste ba SEFOPE nian, teste ba PNTL, VIP, laboratóriu, medical check up, buat sira-ne’e selu liuhusi sistema dijitál nune’e labele hamosu buat ida naran mál administrasaun,” nia esplika.
Antes ne’e, Diretór Servisu Apoiu Diagnóstiku no Terapéutiku, Vidal de Jesus Lopes, informa HNGV sei asina nota entendimentu ho BNCTL atu estabelese banku ida iha HNGV, nune’e pagamentu saida de’it mak iha tenke liuhusi sistema dijitál.
“Ami halo hela koordenasaun ho BNCTL atu asina MoU, tanba foin lalais sira mai ami hatudu ona fatin hodi estabelese banku ida iha-ne’e atubele halo pagamentu saida de’it mak iha HNGV tenke selu liuhusi sistema dijitál nune’e hamenus mál administrasaun sira,” Vidal informa.
Jornalista: Felicidade Ximenes
Editór: Xisto Freitas da Piedade
