DILI, 29 Jullu 2025 (TATOLI)—Prezidente Repúblika, José Ramos Horta, tersa ne’e, iha Palásiu Prezidensiál Dili, fó pose ba Embaixadora foun Timor-Leste ba Reinu Béljika, Maria de Lurdes Martins de Sousa Bessa, no João Freitas de Câmara sai embaixadór Timor-Leste Repúblika Demokrátika Laos.
Iha pose ne’e, Maria de Lurdes Martins de Sousa Bessa simu posse nu’udar Embaixadóra Estraordináriu no Plenipotensiáriu ba Reinu Béljika.
Tuir esperiensia ne’ebé iha, Bessa sai Diplomata distintu ida ho esperiénsia barak iha área polítika, diplomátika no edukasaun.
Antes ne’e, nia okupa kargu hanesan Vise-Ministra Edukasaun no Kultura (2017–2018), Membru Parlamentu Nasionál (2012–2017), no Embaixadór ba Suisa (2021–2024).
Nia mós servisu nu’udar Asistente Polítiku ba UNTAET, Asistente Pesoál ba antigu Prezidente Xanana Gusmão, no Asistente Polítika iha Embaixada EUA iha Timor-Leste.
Ho nia kontribuisuun, Prezidente Ramos Horta kondekora ba nia Grau Kolár Orden Timor-Leste (2024). Nia hanesan defensora ida ba direitu feto no juventude no sai autora ba livru “Loron Ida” no servisu ho organizasaun hanesan Fundasaun Alola hodi promove kauza sosiál sira.
Entretantu, João Freitas de Câmara simu posse nu’udar Embaixadór Estraordináriu no Plenipotensiáriu ba Repúblika Demokrátika Popular Laos.
Câmara antes ne’e servisu nu’udar Embaixadór ba Tailándia, Kambója, Laos no Myanmar, no Reprezentante Permanente Timor-Leste nian ba UNESCAP.
Nia kaer pozisaun xave sira iha Ministeriu Negosius Estranjeirus, inklui Diretór-Jerál ba Ázia-Pasífiku no Sekretáriu Jerál.
Iha 2024, nia nomeadu nu’udar Xefe Protokolu Estadu, hodi jere vizita ofisiál sira inklui vizita sira husi Sekretariu Jeral ONU no Papa Francisco. Nia kontinua serbí nu’udar Sekretariu Jeral, ho dedikasaun ba diplomasia.
Nomeasaun sira-ne’e reafirma Timor-Leste nia kompromisu hodi hametin parseria global sira. Embaixadór rua ne’e lori esperiénsia no dedikasaun ne’ebé boot ba sira nia kargu foun, hodi garante promosaun ba pás, kooperasaun no dezenvolvimentu mútuu.
“Timor-Leste nia misaun diplomátika sira importante tebes atu promove parseria internasionál sira-ne’ebé forte. Ha’u iha konfiansa katak Embaixadóra Bessa no Embaixadór Câmara sei serbi ho exelénsia, hodi hametin liután ita-nia relasaun sira ho Béljika no Laos, no tane aas valór sira ita-nia nasaun nian,” Prezidente Ramos Horta hateten iha nia diskursu.
Prezidente hato’o agradesimentu ba embaixadór sesante sira-nia servisu no oferese apoiu tomak ba Embaixadór foun sira bainhira sira asume sira nia funsaun.
Jornalista : Hortencio Sanchez
Editór : Cancio Ximenes
