DILI, 29 Jullu 2025 (TATOLI) – Institutu Nasionál Estatístika Timor-Leste (INETL) rejista inflasaun 0,1% iha Índise Presu Konsumidór (IPK) fulan-Juñu 2025 kompara ho Maiu iha deflasaun 0,2%.
Tuir dokumentu INETL, mudansa presu grupu hotu sa’e 01% tanba hetan kontribuisaun husi grupu hahán no bebida la’ós alkoólika 0,2%, hatais no sapatu 0,1%, no ekipamentu no manutensaun mobiliáriu uma-laran 0,1%. Enkuantu grupu uma tun 0,1%, ne’ebé sai hanesan mudansa kontráriu ba inflasaun grupu hotu iha fulan ne’e.
“Grupu hahán no bebida la’ós alkoólika sa’e 0,2%, tanba hetan impaktu maioria husi subgrupu modo-tahan 1,5%, ikan no hahán tasi 1,8%, kafé, xá no kokoa 0,3% no ai-fuan 0,2%”, refere nota husi INETL.
Entretantu ba subgrupu masin-midar, marmelada, bani-been, xokolate no hahán midar tun 1,0%, na’an 0,4%, foos 0,2%, mina no bokur 0,4% no produtu ai-han 0,2%, ne’ebé sai hanesan mudansa kontráriu ba inflasaun grupu hahán no bebida la’ós alkoólika.
Mudansa persentajen IPK anuál laiha mudansa 0,0% kompara entre fulan-Juñu 2025 no Juñu 2024, tanba hetan kontribuisaun balansu husi grupu hahán no bebida la’ós alkoólika sa’e 0,1% no edukasaun sa’e 0,4%.
Kona-ba ekipamentu no manutensaun mobiliáriu uma-laran sa’e 0,7%, hatais no sapatu 1,0% uma 0,4% no rekreasaun no kultura 0,6% ba anuál Juñu 2025.
Grupu transporte tun 1,7%, alkoól no tabaku tun 0,9% no komunikasaun 0,9%, ne’ebé sai hanesan mudansa kontráriu ba inflasaun grupu hotu ba anuál Juñu 2025.
Inflasaun tradeable sa’e 0,2% no non-tradeable laiha mudansa 0,0% iha mensál, kompara entre fulan-Juñu 2025 no Maiu 2025. Inflasaun tradeable tun 0,2% no non-tradeable sa’e 0,5% iha anuál, kompara entre Juñu 2025 no Juñu 2024.
Notísia relevante: IPK iha Maiu rejista deflasaun 0,2%
Jornalista: Arminda Fonseca
Editora: Maria Auxiliadora
