VIKEKE, 29 Jullu 2025 (TATOLI)—Reprezentante komunidade Levadae, Suku Matahoi, Postu Administrativu Uatulari, Munisípiu Vikeke, Filomeno de Carvalho informa katak Projetu Eletrifikasaun Komunitária (PEK) ba Aldeia Levadae no Loco-Loco durante ne’e paradu kuaze tinan-tolu, foin hahú hatuur ai-riin (poste) eletrisidade.
“Projetu ne’e paradu kuaze tinan tolu nian laran, nune’e Eletricidade de Timor-Leste, Empreza Públika (EDTL, E.P) foin lalais iha loron 20 fulan-Jullu mak distribui ai-riin mai. Ne’ebé, agora, komunidade hamutuk ho tékniku EDTL sira monta hela ai-riin. Parese agora finaliza ona,” Filomeno de Carvalho ba TATOLI iha Postu Uatulari, Tersa ne’e.
Filomeno hatutan poste ne’e komunidade no EDTL hahú monta iha Aldeia Levadae no montadu ona, agora daudaun kontinua monta bá área Aldeia Loco-Loco.
“Ai-riin eletrisidade monta atu ona, maibé fiu no sasán sira seluk mak seidauk distribuidu. Nune’e, hakarak husu ba EDTL, E.P. aselera distribuisaun materiál hanesan fiu no materiál sira seluk. Aleinde ne’e, ami mós hakarak husu projetu ne’e labele paradu tan, atu ami bele asesu ba eletrisidade tanba kuaze tinan barak ami la asesu ba eletrisidade,” nia hato’o.
Tuir dadus, populasaun Aldeia Loco-Loco no Levadae totál uma-kain 73 no totál populasaun hamutuk na’in-200.
Iha fatin ketak, Koordenadór EDTL, E.P. Munisípiu Vikeke, Ernesto Sarmento hateten kona-ba Projetu Eletrifikasaun Komunitária (PEK) iha Levadae agora daudaun mota poste ba área sira-ne’ebé durante ne’e la asesu ba eletrisidade.
“Durante ne’e paradu tanba materiál hotu-hotu mai husi rai-li’ur liuliu iha nasaun Indonézia. Nune’e, agora monta hotu ona poste sira-ne’e. Ita hein tan materiál sira hanesan fiu. Kuandu iha nasionál iha ona bele distribui ona mai. Ita hakarak ne’e molok tinan ida-ne’e ramata eletrisidade ba Levadae no Loco-Loco bele lakon ona,” nia subliña.
Jornalista: Vitorino Lopez da Costa
Editór: Xisto Freitas da Piedade
