DILI, 30 Jullu 2025 (TATOLI)—Autoridade Inspesaun no Fiskalizasaun Atividade Ekonomia Sanitária no Alimentár (AIFAESA) hamutuk ho Institutu Nasionál Saúde Públika Timor-Leste (INSPTL), iha segunda (28 Jullu) ne’e, lori ona bee Aquase nia amostra ba iha Laboratóriu Bogor Sarawanti Indo Genetek (SIG) Indonézia atu halo teste ba bee nia kualidade.
Notísia Relevante: MCI suspende distribuisaun bee ho marka AQUASE iha merkadu
“Ita konsege rekolla bee iha kada sempel sira-ne’ebe ita foti reprezenta sinku litru kada sempel, iha loron 28 segunda ne’e. ekipa husi AIFAESA no INSPTL ho empreza sira manda ona sampel ba Indonézia atu ba halo teste bee nia kualidade,” Odete Viegas inform aba jornalista sira iha nia kna’ar fatin, Matadoru, ohin.
Nia esplika, bee Aquase ne’e halo teste iha laboratúriu privadu SIG ho kualidade internasionál iha Indonezia.
“Ita espera katak iha semana rua hanesan ne’e, nia rezultadu sei to’o ona mai, atu nune’e ita bele fó sai fali rezultadu hodi informa ba distribuitór sira katak rezultadu mak ida-ne’e, sira konkorda ou lae,” nia hateten.
Nia haktuir, durante sei iha prosesu teste nia laran ne’e, distribuitor sira sei la halo sirkulasaun ba operadór ekonómiku sira seluk atu faan.
“Ita trava hela ho razaun tanba ita hakarak hein katak rezultadu to’o mai, se la prezudika entaun ita fó sai atu sira hahú sira halo sirkulasaun. Maibé iha rezultadu negative, entaun ita hapara sirkulasaun,” nia dehan.
Nia afirma, distribuitór haat ne’ebé AIFAESA rekolla bee ne’e mak hanesan loja Starking, AlfaDili, Sugurama no Senior.
Entretantu, iha loron 28 fulan-Jullu 2025, ekipa AIFAESA liuhusi inspetór sira realiza asaun selajen ba produtu bee ho marka “Aquase” iha loja no kioske sira iha área Taibessi no Matadouru hodi hein rezultadu teste laboratóriu husi Indonézia.
Asaun refere sei kontinua halo ba loja no kioske sira iha territóriu tomak to’o rezultadu teste anúnsia. Entretantu, produtu “Aquase” ne’e rasik, provizoriamente suspende atu labele fa’an ba konsumu públiku.
Notísia Relevante: Empreza Suhurama lamenta ho MKI nia publikasaun kona-ba AQUASE
Jornalista : Felicidade Ximenes
Editór : Cancio Ximenes
