DILI, 07 Jullu 2025 (TATOLI)–Empreza Suhurama Group lamenta ho Ministériu Komérsiu no Indústria (MKI) liuhusi Diresaun Nasionál Regulasaun Komersiál (MKI), iha 26 Juñu2025, ne’ebé fó sai informasaun ba públiku katak sira foti amostra iha Suhurama Group no sira seluk ne’e bee ho marka AQUASE ne’e iha kontaminadu.
Notísia Relevante: MCI suspende distribuisaun bee ho marka AQUASE iha merkadu
Advogadu Privadu Suhurama Group, Ocatavio Cardoso, lamenta ho publikasaun Diretora Diresaun Nasionál Regulasaun Komersiál iha MKI, Manuela da Silva, ho nia ekipa ne’ebé publika katak Suhurama Goup Unipesoál, Lda, nia naran liga ho amostra bee ho marka AQUASE iha prosesu ne´e, sente prezudikadu ba iha publikasaun ne’e rasik.
“Iha prosesu ne’e rasik mak sei fó impaktu tanba hamihis ona públiku nia konfiansa nian ba empreza ho razaun sira-ne’ebé amostra ba bee ho marka AQUASE ne’e. Tanba ne’e mak ami lamenta ho hahalok ida-ne’e,” Ocatavio Cardoso dehan bainhira halo konferénsia impresa iha Pantai Kelapa, ohin.
Empreza konsidera ekipa MKI mai iha fatin Empreza nian lahó etika, tanba antes sira atu foti amostra ba bee ho marka AQUASE ne’e rasik laiha koñesementu ba na’in ba empreza.
“Ami konsidera katak ekipa ne’ebe dirije husi Diretora Manuela, mai iha ami-nia empreza laiha etika. Tanba, antes atu mai foti amostra ba bee refere, ami tenke iha koñesementu iha situasaun ne’ebé ami enfrenta mak bainhira sira tama mai foti ami-nia sasán sein iha autorizasaun husi ami,” nia dehan.
Nia mós dehan, Empreza Suhurama nia atividade lubuk ida-ne’ebé sempre servisu hamutuk ho instituisaun Estadu sira hodi bele kumpre regra liga ba ijeniku saúde ne’ebe durante la’o hela.
“Foin akontese mak husi Diresaun Nasionál Regulasaun tama iha ami-nia fatin foti amostra, maibé esperiénsia ami-nian kona-ba amostra mensál no anuál parte husi Autoridade Inspesaun no Fiskalizasaun ba Atividade Ekonómika, Sanitária no Alimentar (AIFAESA) no parte saúde sempre mai foti amostra ba ami-nia produtu,” nia hateten.
Empreza Suhurama nia parte hanesan ramu importadór no nia parte mós la’ós importadór úniku ba produtu ne’e rasik no la’ós sira mak na’in ba produsaun ba bee ho marka AQUASE, maibé husi estranjeiru laiha relasaun ho Suhurama.
“Hanesan Empreza Timoroan, ne’ebe esforsu durante ninia ezisténsia ba iha negosiu to’o agora loke indústria hetan konfiansa mós empreza internasionál sira hodi halo atividade. Liuhusi lamentasaun ida-ne’e sente prezudika ba amostra ne’ebé mak mai halo sein iha koñesementu husi empreza na’in no la tuir prosedura normál ba teste laboratóriu, pelumenus iha ami-nia prezensa,” nia fó kitika.
Husi situasaun ne’e, emperza Suhurama sente prezudikadu liuliu ba empreza nia naran ne’ebé halo nia atividade lubuk ida, tanba iha prosesu bee ho marka AQUASE la’ós sira mak na’in ba produsaun ne’e.
“Sosiadade komersiál hanesan Suhurma iha mós produtu rasik ho nune’e lamenta ho sira-nia publikasaun ne’ebé temi empreza nia naran,” nia dehan.
Nia mos husu tenke auomula produtu bee ho marka AQUASE iha setór hotu-hotu, tanba Suhurama la’ós fabrika ba AQUASE, Karik iha kontaminadu ne’ebe mak deteta diretamente ho empreza na’in, tanba Suhurama nia atividade hotu iha kreabilidade tanba sempre tuir prosedimentu legál husi instituisaun Governu nian.
Advogadu mós husu MCI labele desfama empreza nia naran iha públiku, ho nune’e husu ba parte relevante tenke responsabilidade. Se lae, posibilidade boot sei lori diretora MKI ne’e ba Tribunál hodi ko’alia tuir lei ne’ebe vigora iha TL.
Jornalista : Felicidade Ximenes
Editór : Cancio Ximenes
