DILI, 30 Jullu 2025 (TATOLI)—Governu liuhusi reuniaun Konsellu Ministru aprova Projetu Rezolusaun Governu nian ne’ebé hato’o votu kongratulasaun ida ba organizasaun no partisipasaun iha Jogu Desportivu Komunidade País Ko’alia Lian Portugés (CPLP) ba edisaun da-XII 2025, ne’ebé realiza iha Timor-Leste husi loron 17 to’o 27 fulan-Jullu tinan 2025.
Notísia Relevante: Kabuverde kampiaun jogu futeból, mai ho liman mamuk fila ho medalla
Ministru Prezidénsia Konsellu Ministru, Agio Pereira, hateten Governu fó votu kongratulasaun ba susesu boot ne’ebé organiza husi Ministru Juventude Desportu no Sekretária Arte Kultura ho sira-nia ekipa tomak ne’ebé envolvidu iha prosesu eventu ne’e, ho sira-nia dedikasaun boot tebe-tebes mak hodi garante eventu jogu desportvu CPLP
“La’ós ida-ne’e de’it, Governu felisita ho populasaun nia ezemplu di’ak tebe-tebes hatudu entuziasmu ida-ne’ebé kontribui liuliu joven sira-ne’ebé servisu voluntariamente hodi tulun atividade ne’e la’o ho di’ak,” Ministru Prezidénsia ne’e relata ba jornalista sira hafoin remata reuniaun Konsellu Ministru iha Palásiu Governu, kuarta ne’e.
Aleinde ne’e, nia dehan, Governu mós felisita mós jornalista sira-ne’ebé ne’ebé fó atensaun tomak ba jogu ne’e hodi halo transmisaun no hatudu ba mundu rai-nabilan iha jogu desportvu CPLP.
Tuir dokumentu ofisiál ne’ebé Agência Tatoli asesu haktuir katak, rezolusaun ne’e rekoñese esforsu organizasionál notável ne’ebé hala’o husi Komisaun Eventuál Interministeriál ne’ebé kria hodi kooordena atividade husi eventu ne’e, nune’e mós empeñu pesoál Ministru Juventude, Desportu, Arte no Kultura, Sekretáriu Estadu Arte no Kultura no ekipa ministeriál tomak, ne’ebé dedikasaun determinante ona ba susesu inisiativa ne’e.
Governu felisita mós atleta timoroan ba sira-nia partisipasaun ezemplár, elojia envolvimentu entuziástiku populasaun nian no destaka kontributu joven voluntáriu, forsa seguransa no órgaun komunikasaun sosiál nian.
Rezolusaun ne’e subliña mós espíritu uniaun, amizade no selebrasaun ne’ebé marka jogu sira ne’e, ne’ebé refleta boasvinda koloroza no ospitalidade povu timoroan nian.
Notísia Relevante: Xadrez iha CPLP: Portugál lori medalla osan-mean neen, Timor-Leste hela ho medalla bronze tolu
Jornalista : Alexandra da Costa
Editór : Cancio Ximenes
