DILI, 30 Jullu 2025 (TATOLI)—Ministériu Edukasaun (ME) hahú ona halo seriesaun valór bolsa kandidatu iha nível ensinu sekundáriu.
“Agora prosesu hela ba seriesaun valór atu hatene manorin ne’ebé mak ho valór a’as liu tanba iha ne’ebá tuir agrupamentu disiplina. Iha ne’ebá agrupamentu balun pasa barak no iha balun pasa menus, entaun presiza halo seriesaun valór ho didi’ak, nune’e bele koloka tuir valór boot tun mai kraik,” Ministra Edukasaun, Dulce de Jesus Soares, informa ba Ajénsia TATOLI, iha resintu Palásiu Governu, Kuarta ne’e.
ME garante katak fulan oin bele kolokadu tuir disiplina ne’ebé iha. “Ha’u fiar katak iha fulan-Agostu nia laran ita bele halo kolokasaun ona”.
Totál profesór ne’ebé pasa 1.095 husi totál ema 8.779 ne’ebé konkorre vaga ba ensinu sekundáriu ne’e.
“Ida-ne’e seidauk to’o alvu ne’ebé Ministériu Edukasaun presiza tanba totál vaga ne’ebé ita iha ne’e hamutuk 1.450, ita sei falta 355,” nia akresenta.
Notísia relevante : Ministra Edukasaun otimista manorin programa bolsa kandidatu sei simu saláriu iha Jullu
Disiplina portugés no temas husi literatura no kultura presiza vaga 250 maibé iha de’it 114, entaun presiza tan ema 136. Tetun vaga 125 maibé iha de’it 21, entaun presiza 104. Inglés vaga 125, maibé pasa iha de’it 40 no sei presiza tan 85. Malaiu vaga 75, pasa de’it na’in-hitu no sei falta ema 68. Istória jeografia no sidadania vaga iha 150, pasa hamutuk 73 no falta ema 77.
Ekonomia no métodu kuantitativu vaga iha 100 maibé ema pasa liu alvu. Disiplina vaga iha 100 maibé pasa ne’e iha de’it 20 no sei falta 80. Fízika no kímika vaga 125, pasa 41 no falta tan 84. Biolojia no jeolojia vaga 100, pasa hamutuk 160, entaun ida-ne’e mós liu tiha alvu ministériu nian.
Teknolojia, multimídia no informátika vaga iha 125 no ema pasa 158. Edukasaun fízika no Desportu vaga iha 100 maibé pasa na’in-tolu no sei falta 93. Relijiaun no morál iha vaga 100 maibé pasa 137.
“Sei falta vaga 355, Ministériu dukasaun sei loke tan ba ida-ne’e maibé ita agora sei foka ba ensinu sekundáriu, ne’ebé daudaun ita prepara hela atu anúnsia ba públiku,” nia katak.
Jornalista : Osória Marques
Editora : Julia Chatarina
